Honor Magic 6 Pro at MWC 2024 : चिनी स्मार्टफोन कंपनी ऑनरने मोबाईल वर्ल्ड काँग्रेसमध्ये आपला नवीन स्मार्टफोन सादर केला आहे. Honor Magic 6 Pro या स्मार्टफोनचं वैशिष्ट्य म्हणजे यामध्ये असणारं एआय आय-ट्रॅकिंग फीचर. या फीचरच्या मदतीने यूजर्स केवळ फोनच्या स्क्रीनकडे बघून आपली कारही कंट्रोल करू शकणार आहेत.

ऑनर मॅजिक 6 प्रो हा स्मार्टफोन चीनमध्ये यापूर्वीच लाँच करण्यात आला आहे. आता MWC 2024 मध्ये याचं ग्लोबल लाँचिंग होणार आहे. याची किंमत कंपनीने 1,299 युरो एवढी निश्चित केली आहे. भारतीय रुपयांमध्ये ही किंमत 1,16,500 रुपये आहे. अर्थात, हा फोन भारतात कधी लाँच होणार याबाबत अद्याप कोणतीही माहिती समोर आलेली नाही.

फीचर्स

या स्मार्टफोनमध्ये 6.8 इंच मोठा डिस्प्ले देण्यात आला आहे. यामध्ये फुल HD रिझॉल्यूशन आणि 120Hz रिफ्रेश रेट दिला आहे. या फोनच्या डिस्प्लेचं वैशिष्ट्य म्हणजे यामध्ये Nano Crystal Shield कव्हर देण्यात आलंय. ही नव्या प्रकारची काच आहे जी इतर स्मार्टफोन डिस्प्लेच्या तुलनेत 10 पट अधिक मजबूत असल्याचा दावा कंपनीने केला आहे. यासोबतच स्क्रीनला स्क्रॅचप्रूफ बनवण्यासाठी त्यावर सिलिकॉन नायट्रेट कोटिंगही दिलं आहे.

या स्मार्टफोनमध्ये स्नॅपड्रॅगन 8 जेन 3 चिपसेट देण्यात आलाय. तसंच याच्या टॉप मॉडेलमध्ये 1TB स्टोरेज आमि 16GB रॅम देण्यात आली आहे. Honor Magic 6 Pro फोनमध्ये 5,600 mAh एवढी तगडी बॅटरी दिली आहे, जी 80W वायर्ड आणि 60W वायरलेस चार्जिंगला सपोर्ट करते.

या स्मार्टफोनमध्ये ट्रिपल कॅमेरा सेटअप देण्यात आलाय. यातील प्रायमरी सेन्सर 50MP क्षमतेचा आहे. सोबत यामध्ये 50MP अल्ट्रावाइड लेन्स आणि 180MP क्षमतेचा पेरिस्कोप लेन्स देण्यात आला आहे. यामध्ये 50MP फ्रंट कॅमेरा देण्यात आला आहे.