घरामध्ये फ्रीज असणं ही एकेकाळी चैन मानली जायची. मात्र, आता फ्रीज ही गरज बनली आहे. त्यामुळे लाखो घरांमध्ये आजकाल फ्रीज असतोच. बहुतांश लोक किचनमध्ये एका कोपऱ्यात, किंवा विशिष्ट ठिकाणी फ्रीज ठेवतात. जवळपास सर्वच लोक आपला फ्रीज भिंतीला टेकून ठेवतात. मात्र, हे चुकीचं असल्याचं तज्ज्ञांनी म्हटलं आहे.

काय होतं नुकसान?

फ्रीज भिंतीला टेकून ठेवल्यामुळे लाईट बिल जास्त येतं, असं तज्ज्ञांनी स्पष्ट केलं आहे. आतले पदार्थ थंड ठेवण्यासाठी फ्रीजच्या मशीनला मोठ्या प्रमाणात एनर्जी वापरावी लागते. या प्रक्रियेत फ्रीज अगदी गरम होतो. ही हीट फ्रीजच्या मागे असलेल्या ग्रिलच्या माध्यमातून बाहेर पडते.

जेव्हा फ्रीज भिंतीला टेकून ठेवलेला असतो, तेव्हा फ्रीजमधून हीट बाहेर पडण्यास अडथळा येतो. कोणत्याही इलेक्ट्रॉनिक वस्तूमधून हीट बाहेर पडणं हे ती वस्तू सुस्थितीत राहण्यासाठी गरजेचं असतं. फ्रीजमधून हीट बाहेर न पडल्यास, आतील पदार्थ थंड ठेवण्यासाठी त्याला आणखी एनर्जी खर्च करावी लागते. यामुळेच विजेचा जास्त वापर होतो.

किती दूर ठेवावा फ्रीज?

तज्ज्ञांनी दिलेल्या माहितीनुसार, घरातील फ्रीज हा भिंतीपासून सुमारे 6 ते 10 इंच दूर ठेवावा. यामुळे फ्रीजमधील हीट बाहेर पडण्यासाठी पुरेशी जागा मिळते, आणि फ्रीज ओव्हरहीट होऊन खराब होण्याचा धोका टळतो.

अशी घ्या खबरदारी

फ्रीजचं आयुष्य वाढावं यासाठी आणखी एक गोष्ट करणं गरजेचं आहे, ती म्हणजे फ्रीजजवळ हीटर, मायक्रोवेव्ह अशा गोष्टी ठेऊ नयेत. या गोष्टींमधून बाहेर पडणाऱ्या हीटमुळे देखील फ्रीजचं आयुष्य कमी होऊ शकतं.