सध्या मोबाईलमध्ये मालवेअर किंवा व्हायरस यांच्या माध्यमातून फसवणूक होण्याचं प्रमाण वाढलं आहे. हॅकर्स नवनवीन प्रकारचे व्हायरस तयार करून मोबाईलची सिक्युरिटी भेदण्याचा प्रयत्न करत आहेत. अशातच, नागरिकांच्या डिजिटल सुरक्षेसाठी केंद्र सरकारने पाऊल उचललं आहे.

केंद्र सरकारच्या टेलिकम्युनिकेशन विभागाने (DoT) मोबाईलमधील व्हायरस काढण्यासाठी काही टूल्स लाँच केले आहेत. हे टूल्स नागरिकांसाठी मोफत उपलब्ध करून देण्यात आले आहेत. यासंदर्भात माहिती देण्यासाठी सरकार सर्व नागरिकांना टेक्स्ट मेसेजही करत आहे.

केंद्राचा टेक्स्ट मेसेज

केंद्र सरकार सध्या नागरिकांना एक मेसेज करत आहे. "सायबर सुरक्षित रहा! आपल्या डिव्हाईसला बॉटनेट संक्रमण आणि मालवेअरपासून सुरक्षित ठेवण्यासाठी सीईआरटी-इन, भारत सरकार हे फ्री बॉट रिमूव्हल टूल डाऊनलोड करण्याचा सल्ला देतंय." अशा आशयाचा हा मेसेज आहे. यामध्ये हे टूल डाऊनलोड करण्यासाठी लिंकही देण्यात आली आहे.

काय आहे हे टूल?

सरकारने दिलेल्या माहितीनुसार, सायबर स्वच्छता केंद्र पोर्टलच्या माध्यमातून यूजर्स मोफत मालवेअर डिटेक्शन टूल्स वापरू शकणार आहेत. या टूल्सच्या मदतीने तुमच्या फोनमधील व्हायरस ओळखता येईल. हे पोर्टल इंटरनेट सर्व्हिस प्रोव्हाईडर आणि अँटीव्हायरस कंपन्यांसोबत मिळून काम करतं. भारत सरकारच्या कम्प्युटर इमर्जन्सी रिस्पॉन्स टीमच्या (CERT-In) नियंत्रणात हे पोर्टल आहे.

असा करा वापर

तुमच्या मोबाईलमध्ये असणारे मालवेअर काढून टाकण्यासाठी सर्वात आधी www.csk.gov.in/ या वेबसाईटवर जा. यानंतर सिक्युरिटी टूल्स या पर्यायावर क्लिक करा. यानंतर तुम्हाला ज्या कंपनीचे बॉट रिमूव्हल टूल तुम्हाला वापरायचं आहे, त्या कंपनीची निवड करा. त्यानंतर समोर दिसणाऱ्या डाऊनलोड बटणावर क्लिक करा. यानंतर हे अ‍ॅप सुरू करा. हे अ‍ॅप तुमच्या मोबाईलला स्कॅन करून व्हायरस किंवा मालवेअर डिटेक्ट करेल.

कम्प्युटरची सुरक्षा

केवळ मोबाईलच नाही, तर कम्प्युटरच्या सुरक्षेसाठीही केंद्र सरकारने पावलं उचलली आहेत. CSK पोर्टलवर USB Pratirodh आणि AppSamvid हे दोन अ‍ॅप्स देण्यात आले आहेत. आपल्या कम्प्युटरमध्ये हे दोन अ‍ॅप्स डाऊनलोड करून तुम्ही पीसी सुरक्षित करू शकता. USB Pratirodh हे अ‍ॅप तुमच्या पीसीला जोडल्या जाणाऱ्या रिमूव्हेबल स्टोरेज मीडियाला स्कॅन करतं. तर, AppSamvid हे अ‍ॅप तुमच्या पीसीमध्ये केवळ सुरक्षित जावा फाईल्स चालतील याची खबरदारी घेतं.