ISRO Solar Mission : देशाची महत्त्वाकांक्षी चांद्रमोहीम आता अंतिम टप्प्यात पोहोचली आहे. चांद्रयान-3 हे येत्या काही दिवसांमध्येच चंद्रावर लँड होईल. याकडे लक्ष असतानाच, इस्रोने दुसरीकडे आपल्या सौरमोहीमेची सुरूवातही केली आहे. सूर्याचा अभ्यास करण्यासाठी पाठवण्यात येणारा 'आदित्य एल-1' हा उपग्रह श्रीहरीकोटामध्ये पोहोचला आहे.

मंगळवारी हा उपग्रह आंध्र प्रदेशातील श्रीहरीकोटा येथे नेण्यात आला. याठिकाणी असलेल्या सतीश धवन अंतराळ संशोधन केंद्रावरून हा उपग्रह अंतराळात प्रक्षेपित करण्यात येईल. इस्रोने या लाँचिंगची तारीख अद्याप जाहीर केली नसली, तरी सप्टेंबर महिन्याच्या पहिल्या आठवड्यात हे प्रक्षेपण होण्याची शक्यता आहे.

काय आहे मोहीम?

सूर्याचा अभ्यास करण्यासाठी इस्रोची ही पहिली सौरमोहीम असणार आहे. यामध्ये आदित्य एल-1 हा उपग्रह सूर्य आणि पृथ्वीच्या मध्ये असणाऱ्या एका लँग्रेज पॉइंटवर पोहोचवण्यात येईल. या कक्षेत राहून हा उपग्रह कोणत्याही अडथळ्याशिवाय सूर्याचे सातत्याने निरीक्षण करेल. (Aditya L1 Update)

सूर्यदेवाचं दुसरं नाव 'आदित्य' हे या उपग्रहाला देण्यात आलं आहे. ज्या ठिकाणी हा उपग्रह सोडण्यात येईल, त्या पॉइंटला L1 असं नाव आहे. त्यामुळे इस्रोच्या या मोहिमेला Aditya L1 असं म्हटलं जात आहे. (ISRO Sun Mission)

चांद्रयानाच्या लँडिंगनंतर प्रक्षेपण

भारताचं चांद्रयान-3 हे सध्या यशस्वीपणे आपल्या मोहिमेचे सर्व टप्पे पार पाडत आहे. यामुळे साधारणपणे 23 ऑगस्ट रोजी हे यान चंद्रावर सॉफ्ट लँडिंग करेल अशी आशा व्यक्त करण्यात येत आहे. हे लँडिंग झाल्यानंतर कदाचित इस्रो आदित्यच्या प्रक्षेपणाची तारीख जाहीर करेल. (Chandrayaan 3 Update)

कसा असणार उपग्रह

या उपग्रहामध्ये सात उपकरणं असतील. यातील चार उपकरणं सूर्याच्या फोटोस्फिअर, क्रोमोस्फिअर आणि सूर्याचा पृष्ठभाग म्हणजेच कोरोनावर लक्ष ठेवतील. इतर तीन उपकरणं ही L1 पॉइंटवर असणाऱ्या कणांचा आणि आजूबाजूच्या गोष्टींचा अभ्यास करतील.