ISRO Moon Mission : भारताची महत्त्वाकांक्षी चांद्रमोहीम यशस्वी झाली आहे. 'चांद्रयान-3'ने चंद्राच्या दक्षिण ध्रुवाजवळ सॉफ्ट लँडिंग केलं आहे. यामुळे चंद्राच्या या भागात उतरणारा भारत पहिलाच देश ठरला आहे. इस्रोच्या या यशावर जगभरातून त्यांच्यावर कौतुकाचा वर्षाव होतो आहे.

यातच इस्रोच्या वैज्ञानिकांचा जल्लोष करतानाचा एक व्हिडिओ आता समोर आला आहे. एक मोठी मोहीम यशस्वीपणे पार पाडल्यानंतर इस्रोचे बहुतांश वैज्ञानिक पार्टी करताना दिसत आहेत. इस्रोचे प्रमुख एस. सोमनाथ हे अगदी जोशात डान्स करताना या व्हिडिओमध्ये दिसत आहेत.

पार्टी तो बनती है

इस्रोच्या वैज्ञानिकांचा हा व्हिडिओ मेघ अपडेट्स नावाच्या एक्स हँडलने शेअर केला आहे. यावर नेटकरी देखील चांगल्या प्रतिक्रिया देत आहेत. एवढ्या मेहनतीनंतर अशा प्रकारे आनंद साजरा करणं हा या वैज्ञानिकांचा हक्कच आहे, ते नक्कीच हे डिजर्व करतात; अशा आशयाच्या प्रतिक्रिया नेटिझन्स देत आहेत.

पुढील मोहिमांची तयारी सुरू

अर्थात, इस्रो काही चांद्रयान मोहिमेनंतर आराम करणार नाहीये. इस्रोने यापूर्वीच 'आदित्य एल-1' मोहिमेची तयारी सुरू केली आहे. ही भारताची पहिली सौरमोहीम असणार आहे. यासाठी आदित्य हा उपग्रह श्रीहरीकोटा येथे नेण्यात आलेला असून, सप्टेंबरच्या पहिल्या आठवड्यात याचं प्रक्षेपण होण्याची शक्यता आहे.