ISRO News : भारताला दुसऱ्या स्पेसपोर्टची गरज निर्माण झाली आहे. श्रीहरीकोटा येथून मोठ्या क्षमतेचं रॉकेट लाँच करण्यासाठी सर्व सज्जता आहेच, परंतु पीएसएलव्ही आणि ५०० किलोग्रॅम वजनाच्या उपग्रहांना तैनात करण्यासाठी डिझाईन केलेल्या 'एसएसएलव्ही'सारख्या लाँच वाहनांसाठी अडचणी निर्माण होत आहेत.

श्रीहरीकोटा येथून पोलर ऑर्बिटसाठी जेव्हा लाँचिंग केली जाते तेव्हा रॉकेटचा प्रक्षेपण मार्ग असा असतो की लाँच वाहनाला श्रीलंकेच्या आकाशात झेप घ्यावी लागते. त्यामुळे सुरक्षेच्या संबंधाने प्रश्न उपस्थित होतात. त्यामुळेच इस्रोला दुसऱ्या लाँचिंग सेंटरची गरज भासत आहे.

नवीन लाँचिंग सेंटरची गरज ओळखून लवकरच श्रीहरीकोटा येथील लाँचिंग सेंटरप्रमाणेच दुसरं स्पेसपोर्ट मिळणार आहे. पंतप्रधान नरेंद्र मोदी यांनी बुधवारी तामिळनाडूच्या कुलशेखरपट्टनम् येथे भारताच्या दुसऱ्या स्पेसपोर्टची कोनशिला ठेवली.

प्रस्तावित असलेलं नवीन स्पेसपोर्ट श्रीहरीकोटातील 'इस्रो'पासून ७०० किलोमीटर दूर आहे. या सेंटरला छोट्या उपग्रहांना लो अर्थ ऑर्बिटमध्ये लाँच करण्यासाठी विकसित करण्यात येत आहे.

नवीन स्पेसपोर्टची गरज काय?

भारताकडून आपल्या अंतराळ मोहिमेचा विस्तार वाढवण्याची गरज निर्माण झाली आहे. पायाभूत सुविधांसाठी देशाला अतिरिक्त प्रक्षेपणांची आवश्यकता आहे. विशेषतः कमी वजनाची रॉकेट ध्रुवीय कक्षेत पाठवण्यासाठी नवीन सेंटरची गरज आहे.

श्रीहरीकोटा येथून प्रक्षेपण करताना श्रीलंकेच्या अवकाशातून मार्ग आहे. त्यामुळे सुरक्षिततेचा प्रश्न निर्माण होतो. नवीन लाँचिंग सेंटरमध्ये इंधनाचीही बचत होणार आहे. नवीन सेंटर किनारपट्टीच्या भागामध्ये असल्यामुळे प्रक्षेपण कामातील मलबा निवासी भागांवर पडणार नाही.