भारतीय अवकाश संशोधन संस्था (इस्रो) आता अमेरिकेतील उद्योगपती एलॉन मस्क यांच्या ‘स्पेसएक्स’ या खासगी संस्थेच्या मदतीने प्रथमच ‘जीसॅट-२०’ (नवे नाव जीसॅट-एन२) या पुढील पिढीतील मोठा दूरसंचार उपग्रह अवकाशात सोडणार आहे.

‘न्यूस्पेस इंडिया लिमिटेड’ (एनएसआयएल) ही ‘इस्रो’ची व्यावसायिक शाखा ‘स्पेसएक्स’च्या ‘फाल्कन-९’प्रक्षेपकाद्वारे यंदाच्या वर्षातील दुसऱ्या तिमाहीत ‘जीसॅट-२०’चे प्रक्षेपण फ्लोरिडातून करणार आहे. उच्च क्षमतेचा हा दूरसंचार उपग्रह पूर्णपणे स्वदेशी आहे. त्याची निर्मिती व त्यासाठीचा निधी आणि कार्यचालन ‘एनएसआयएल’ने केले आहे.

‘‘इतर कोणताही प्रक्षेपक वेळेत उपलब्ध होत नसल्याने भारताला ‘स्पेसएक्स’शी मदत घ्यावी लागली आहे,’’ असे ‘इस्रो’चे अध्यक्ष एस.सोमनाथ यांनी सांगितले. ‘एनएसआयएएल’ने या संभाव्य उड्डाणासाठी ‘स्पेसएक्स’शी करार केला आहे. मोठे उपग्रह सोडण्यासाठी भारत आतापर्यंत फ्रान्सच्या ‘एरियनस्पेस’ या समूहावर अवलंबून राहावे लागत होते. ‘स्पेसएक्स’च्या रूपाने भारताला आता नवा पर्याय उपलब्ध झाला आहे.