Isro vs Microsoft : गेल्या काही वर्षांत अंतराळ क्षेत्रात खूप वेगाने प्रगती झाली आहे. त्यात खासगी क्षेत्राचे येणे हे त्याचे सर्वात मोठे कारण आहे. यामुळे अमेरिकेतील नासाला तर गती दिलीच पण आता जगातील इतर देशही या स्पर्धेत पुढे जाण्याचा प्रयत्न करत आहेत. यातून प्रेरित होऊन भारताची अंतराळ संस्था ISRO म्हणजेच भारतीय अंतराळ संशोधन संस्थेनेही देशाच्या अवकाश क्षेत्रात खाजगी क्षेत्राचा सहभाग वाढवण्यासाठी प्रयत्न सुरू केले आहेत. गेल्या महिन्यातच भारताने खाजगी क्षेत्रात विकसित केलेल्या रॉकेटची पहिली चाचणी घेतली. आता इस्रोने खाजगी क्षेत्राला प्रोत्साहन देण्यासाठी जगातील सर्वात मोठ्या आयटी कंपनी मायक्रोसॉफ्टशी हातमिळवणी केली आहे.

कोणाला फायदा होईल

ISRO आणि Microsoft यांच्यातील करार भारतातील अंतराळ तंत्रज्ञानाशी संबंधित स्टार्टअप्सना आधार देण्यासाठी काम करेल. यासाठी दोघांमध्ये नुकताच सामंजस्य करार करण्यात आला आहे. यामुळे देशभरातील अंतराळ तंत्रज्ञान स्टार्टअप्सची ताकद वाढेल, असा विश्वास इस्रो आणि मायक्रोसॉफ्ट या दोघांनाही आहे.

या नवीन करारानुसार, ISRO नवीन स्पेस टेक्नॉलॉजी स्टार्टअप्स शोधण्यासाठी काम करेल आणि त्यांना मायक्रोसॉफ्ट स्टार्टअप फाऊंडर्स हब प्लॅटफॉर्मवर आणले जाईल, जे त्यांच्या स्टार्टअपपासून युनिकॉर्न बनण्यापर्यंतच्या प्रवासाच्या प्रत्येक टप्प्यावर समर्थन प्रदान करेल. यामुळे त्यांना त्यांच्या तांत्रिक विकासात खूप मदत होईल.

या प्लॅटफॉर्मचा काय फायदा होईल?

स्टार्टअप कंपन्यांना त्यांचा व्यवसाय चालवण्यासाठी लागणारी तांत्रिक साधने आणि संसाधने मिळू शकतील. इस्रोचे प्रमुख एस सोमनाथ म्हणतात की या करारामुळे स्पेस टेक्नॉलॉजी स्टार्ट-अप कंपन्यांना खूप फायदा होईल कारण ते डीप लर्निंग, मशीन लर्निंग आणि एआय सारख्या प्रगत तंत्रांद्वारे विविध ऍप्लिकेशन्समध्ये भरपूर सॅटेलाइट डेटाचे विश्लेषण आणि प्रक्रिया करू शकतील.