भारताने काही दिवसांपूर्वीच चांद्रयान-3 मोहीम यशस्वीपणे पार पाडली. यानंतर आता जपानने देखील आपली चांद्रमोहीम लाँच केली आहे. भारतीय वेळेनुसार आज पहाटे 5:12 वाजता H2-A रॉकेटसोबत जपानने दोन अंतराळ यान लाँच केले. या मोहिमेचं नाव SLIM असं ठेवण्यात आलं आहे.

जपानने चंद्रावर एक एक्स-रे टेलिस्कोप आणि एक छोटं लँडर पाठवलं आहे. ही मोहीम यशस्वी झाल्यास चंद्रावर सॉफ्ट लँडिंग करणारा जपान पाचवा देश ठरेल. पहाटे लाँच झाल्यानंतर दोन टप्प्यांमध्ये टेलिस्कोप आणि लँडर रॉकेटपासून वेगळे झाले. आता या दोघांना चंद्रावर पोहोचण्यासाठी सुमारे चार ते सहा महिन्यांचा वेळ लागणार आहे.

H2-A रॉकेट हे जपानचं सर्वात विश्वासार्ह रॉकेट आहे. जपानची अंतराळ संशोधन संस्था JAXA ने यापूर्वी 42 उड्डाणांमध्ये याचा वापर केला होता. यापैकी 41 उड्डाणे यशस्वी होती. यानंतर आजचं उड्डाण देखील यशस्वीपणे पार पाडून या रॉकेटने आपली कामगिरी कायम ठेवली आहे.

जपानच्या चांद्र मोहिमेची तयारी गेल्या कित्येक महिन्यांपासून सुरू आहे. मात्र, काही ना काही कारणांमुळे हे प्रक्षेपण पुढे ढकललं जात होतं. यापूर्वी 25 ऑगस्ट रोजी याचं प्रक्षेपण होणार होतं, मात्र हवामान योग्य नसल्यामुळे ते पुढे ढकलण्यात आलं. जपानने यापूर्वीही चंद्रावर सॉफ्ट लँडिंगचा अयशस्वी प्रयत्न केला आहे.

जपान या मोहिमेत चंद्रावर एक 'एक्स-रे इमेजिंग अँड स्पेक्ट्रोस्कोपी मिशन' म्हणजेच XRISM नावाचा टेलिस्कोप पाठवणार आहे. सोबतच 'स्मार्ट लँडर फॉर इन्व्हेस्टिंग मून' (SLIM) हे छोटंसं लँडर देखील पाठवेल. हे लँडर अगदी कमी जागेत चंद्रावर उतरणार आहे. त्यामुळेच याला 'स्नायपर' असंही म्हटलं जात आहे.