या विश्वामध्ये पृथ्वी सोडून इतर ग्रहांवर देखील जीवन असल्याची शक्यता कोणीही नाकारत नाही. त्यामुळेच परग्रहवासियांचा शोध घेण्यासाठी वैज्ञानिकांचा सातत्याने प्रयत्न सुरू असतो. या एलियन्ससाठी आतापर्यंत अंतराळात कित्येक संदेश पाठवण्यात आले आहेत.

यातीलच एका संदेशाला आता उत्तर मिळण्याची शक्यता आहे. जपानी प्राध्यापक आणि रिसर्चर मसाकी मोरिमोटो आणि हिसाशी हीराबायशी यांनी 1983 साली अंतराळात काही रेडिओ संदेश पाठवले होते. या संदेशांना आता उत्तर येण्याची शक्यता आहे. यामुळेच असे संदेश रिसीव्ह करण्यासाठी जपानमध्ये मोठा अँटीना बसवण्यात येतो आहे.

काय होता संदेश?

15 ऑगस्ट 1983 साली हा संदेश पाठवण्यात आला होता. "हॅलो, तिकडे कोणी आहे का?" असं या संदेशामध्ये म्हटलं होतं. हा संदेश पाठवणारे वैज्ञानिक मासाकी यांचं 2010 साली निधन झालं. मात्र, त्यांच्या टीममध्ये असणारे शिन्या नरुसावा यांना या संदेशाचं उत्तर येईल अशी आशा आहे. त्यामुळेच याबाबत तयारी सुरू करण्यात आली आहे. (Japan Alien Message)

अल्टेयर ग्रहावरुन उत्तराची आशा

पृथ्वीपासून 16.7 प्रकाशवर्षे दूर असणाऱ्या अल्टेयर ग्रहावरून हे उत्तर येण्याची आशा शिन्या यांनी व्यक्त केली. या ग्रहावर जीवसृष्टीची सगळ्यात जास्त शक्यता असल्याचं यापूर्वी कित्येक संशोधनांमध्ये म्हटलं गेलं आहे. पृथ्वीपासून या ग्रहावर संदेश पोहोचण्यासाठी लागणारा वेळ, आणि तेथून पुन्हा उत्तर येण्यासाठी लागणारा अंदाजित वेळ लक्षात घेता; आता सिग्नल कॅच करण्याची तयारी सुरू करण्यात आली आहे. (Aliens)

आज सुरू होणार अँटीना

जपान एअरोस्पेस एक्सप्लोरेशन एजन्सीने (JAXA) दिलेल्या माहितीनुसार, देशाच्या साकू प्रांतामध्ये या संदेश लहरी कॅच करणारा अँटीना बसवण्यात येणार आहे. भारतीय वेळेनुसार मंगळवारी (22 ऑगस्ट) संध्याकाळी 6.30 वाजता हा अँटीना सुरू करण्यात येईल.

जपानसाठी मोठा दिवस

जपानसाठी हा दिवस अगदी महत्त्वाचा आहे. जपानी कॅलेंडरनुसार, वर्षाच्या सातव्या महिन्याच्या सातव्या दिवशी तानाबाता फेस्टिवल साजरं केलं जातं. या दिवशी संपूर्ण जपानमधील लोक ठिकठिकाणी एकत्र येत, लहान लहान आकाशकंदील हवेत सोडतात. या फेस्टिवलला स्टार फेस्टिवल देखील म्हटलं जातं. आजच जपानमध्ये हे फेस्टिवल साजरे होत आहे.