मेक्सिकोमध्ये वैज्ञानिकांनी एलियन्सचे मृतदेह मिळाल्याचा दावा केला आहे. या वैज्ञानिकांनी दोन मृतदेहांचं प्रदर्शन केलं. हे मृतदेह सुमारे एक हजार वर्षांपूर्वीचे असल्याचं म्हटलं जात आहे. हा व्हिडिओ सध्या सोशल मीडियावर व्हायरल होतो आहे.

परग्रहावर राहणारे जीव, म्हणजेच एलियन्सबद्दल मानवाला मोठं कुतूहल आहे. आजपर्यंत कित्येक चित्रपटांमधून आणि पुस्तकांमधून एलियन्सचा उल्लेख करण्यात आला आहे. हे एलियन्स कसे दिसत असतील याबाबत कित्येकांनी कल्पना केली आहे. मात्र, आता मेक्सिकोमधील हे एलियन खरे असतील, तर परग्रहवासींच्या अस्तित्त्वाबाबत हा ठोस पुरावा मानला जाऊ शकतो.

हे एलियन्स पेरू देशातील कौस्को येथील खाणींमध्ये आढळले असल्याचा दावा करण्यात आला आहे. मेक्सिकोमध्ये संसदेत यासाठी विशेष कार्यक्रम आयोजित करण्यात आला होता.

मेक्सिकोतील पत्रकार आणि यूएफओ शास्त्रज्ञ जॅमी मौसान यांनी हा कार्यक्रम आयोजित केला होता. जॅमी हे एलियन्सबद्दल कित्येक वर्षांपासून अभ्यास आणि संशोधन करत आहेत. मेक्सिकोतील काही इतर वैज्ञानिकांचीही मदत त्यांना या कार्यक्रमासाठी झाली.

हे एलियन्स आपल्या पृथ्वीवरील नाहीत. मात्र, हे यूएफओ सोबत नव्हे तर चक्क पेरूमधील एका खाणीत आढळले आहेत. यांना शोधल्यानंतर त्यांचं फॉसिलायझेशन करण्यात आलं; असं जॅमी यावेळी म्हणाले.

मौसान यांनी यावेळी मेक्सिको सरकार आणि अमेरिकेतील अधिकाऱ्यांना संबोधन केले. ते म्हणाले, की मेक्सिकोतील ऑटोनॉमस नॅशनल युनिवर्सिटी येथे एलियन्सच्या मृतदेहांची चाचणी करण्यात आली होती. याठिकाणी वैज्ञानिकांनी रेडिओकार्बन डेटिंग तंत्रज्ञानाच्या मदतीने एलियन्सच्या डीएनएचा अभ्यास केला.

या कार्यक्रमाला अमेरिकेतील माजी नेव्ही पायलट रायन ग्रेव्ह्स देखील उपस्थित होते. रायन हे अमेरिकन्स फॉर सेफ एअरोस्पेस या संघटनेचे अध्यक्ष देखील आहेत. आपल्या कारकीर्दीमध्ये आपण एलियन्स पाहिले होते, असा दावा रायन यांनी यापूर्वी केला आहे.