Activision Blizzard Xbox Layoff : नवीन वर्षाच्या पहिल्याच महिन्यात कित्येक मोठमोठ्या कंपन्यांनी कर्मचारी कपातीला सुरुवात केली आहे. यामध्येच आता मायक्रोसॉफ्टचाही नंबर लागला आहे. अ‍ॅक्टिव्हिजन ब्लिझार्ड आणि एक्सबॉक्स या आपल्या कंपन्यांमधील तब्बल 1,900 कर्मचाऱ्यांना मायक्रोसॉफ्टने काढून टाकलं आहे.

दि व्हर्ज या न्यूज वेबसाईटने याबाबत रिपोर्ट दिला आहे. मायक्रोसॉफ्टच्या गेमिंग डिव्हिजनचे सीईओ फिल स्पेन्सर यांच्या एका मेमोचा हवाला देत याबाबतचं वृत्त प्रसिद्ध करण्यात आलं आहे. कंपनीने मुख्य कारवाई अ‍ॅक्टिव्हिजन ब्लिझार्डवर केली असली, तरी यामध्ये एक्स बॉक्स आणि झेनीमॅक्सच्या काही कर्मचाऱ्यांचाही समावेश असल्याचं या रिपोर्टमध्ये म्हटलं आहे.

मायक्रोसॉफ्टच्या गेमिंग डिव्हिजनमध्ये सुमारे 22,000 कर्मचारी काम करतात. लेऑफ करण्यात आलेल्या कर्मचाऱ्यांची संख्या ही एकूण कर्मचाऱ्यांच्या सुमारे आठ टक्के असल्याचं सांगण्यात येत आहे.

"अ‍ॅक्टिव्हिजन, ब्लिझार्ड आणि किंग या टीम्स मायक्रोसॉफ्टमध्ये सहभागी होऊन आता तीन महिन्यांपेक्षा अधिक काळ लोटला आहे. 2024 मध्ये पुढे जात असताना, मायक्रोसॉफ्ट गेमिंग आणि अ‍ॅक्टिव्हिजन ब्लिझार्डच्या स्ट्रॅटजीमध्ये काही बदल होणं गरजेचं आहे. आपल्या वाढत्या बिझनेसला सपोर्ट करेल असं कॉस्ट स्ट्रक्चर तयार करण्याची गरज सध्या आहे. आम्ही मिळून याबाबत चर्चा केली आहे. कोणत्या गोष्टीला प्राधान्य द्यायचं यावरही एकमत झालेलं आहे. याचाच भाग म्हणून आम्हाला हा दुःखद आणि त्रासदायक निर्णय घ्यावा लागणार आहे." असं मत स्पेन्सर यांनी व्हर्जशी बोलताना व्यक्त केलं.

"गेमिंग लीडरशीप टीम आणि मी ही प्रक्रिया अगदी विचापूर्वक पार पाडणार आहे. याचा फटका ज्या कर्मचाऱ्यांना बसेल, त्यांना आम्ही पूर्ण पाठिंबा देऊ. स्थानिक कायद्यानुसार त्यांना कंपनीकडून मदत करण्यात येईल." असंही त्यांनी स्पष्ट केलं.