Europa Clipper : भविष्यात मानव चंद्रावर किंवा मंगळावर वस्ती करू शकतो असं आतापर्यंत कित्येक जणांनी म्हटलं आहे. नासा, इस्रो, स्पेस एक्स अशा कित्येक अंतराळ संशोधन संस्था यादृष्टीने प्रयत्न करत आहेत. यापुढेही जाऊन आपल्या सूर्यमालेतील इतर ग्रहांवर आपण वस्ती करू शकतो का? असा प्रश्नही लोकांना पडतो.

गुरू ग्रहावर माणूस कधी पोहचू शकतो का? असा प्रश्न जर तुम्हाला पडला असेल; तर तुमच्यासाठी वाईट बातमी आहे. आपण गुरू ग्रहावर पोहोचणं शक्य नसल्याचं नासाने स्पष्ट केलं आहे. मात्र, गुरू ग्रहाच्या कक्षेत तुम्ही आपलं नाव नक्कीच पाठवू शकता असंही नासाने म्हटलं आहे. भारतातून आतापर्यंत सुमारे 72 हजार लोकांनी यात आपलं नाव नोंदवलं आहे.

नासाची खास ऑफर

यावेळी नासाने आपली एक खास ऑफर दिली आहे. नासा 2024 मध्ये गुरू ग्रहाच्या एका चंद्रावर आपलं यान पाठवणार आहे. युरोपा क्लिपर अशा नावाची ही मोहीम असणार आहे. गुरू ग्रहाच्या युरोपा नावाच्या बर्फाळ चंद्राचा अभ्यास करण्यासाठी हे यान जाईल. या यानासोबत तुम्ही आपलं नाव पाठवू शकता.

या मोहिमेत आपलं नाव नोंदवण्यासाठी नासाने आपल्या एक्स पोस्टमध्ये एक लिंक देखील दिली आहे. या लिंकवर क्लिक करून तुम्ही 'मेसेज इन अ बॉटल' मोहिमेत सहभागी होऊ शकता.

स्वप्नं पाहणं थांबवू नका

आपल्या पहिल्या एक्स पोस्टमध्ये नासाने मानव कधीच गुरू ग्रहावर पोहोचणार नसल्याचं म्हटलं होतं. यानंतर दुसऱ्या एका पोस्टमध्ये लगेच त्यांनी याबाबत दिलगिरी देखील व्यक्त केली. आपण नेहमीच अंतराळाचा शोध घेत राहणार आहोत, आणि आम्ही सर्वांना असं करण्यासाठी प्रेरणा देऊ इच्छितो. स्वप्नं पाहणं थांबवू नका. अशा आशयाची पोस्ट नासाने केली आहे.