रॉकेटचं लाँचिंग ही कोणत्याही अंतराळ मोहिमेसाठी अगदी महत्त्वाचा टप्पा असतो. यशस्वी प्रक्षेपण झाल्यानंतर शास्त्रज्ञांचा बराचसा ताण कमी होतो. त्यामुळेच काउंटडाऊन पासून, रॉकेट अपेक्षित कक्षेत पोहोचेपर्यंत वैज्ञानिक प्रक्षेपण यशस्वी झाल्याचं घोषित करत नाहीत.

अशातच प्रक्षेपणावेळी मध्येत काही अडथळा आल्यास, कित्येक वर्षांची मेहनत वाया जाण्याचा धोका असतो. मात्र काही वेळा रॉकेट लाँच होताना काही मजेशीर गोष्टीही होतात. नासाच्या एका रॉकेटच्या प्रक्षेपणावेळी देखील अशीच एक घटना घडली होती.

दहा वर्षांपूर्वी, आजच्याच दिवशी नासाचं LADEE हे रॉकेट लाँच झालं होतं. व्हर्जिनिया नासाच्या वालॉप्स फ्लाईट फॅसिलीटी या केंद्रावरून या रॉकेटचं प्रक्षेपण करण्यात आलं. यावेळी लाँच पॅडजवळ असणारा एक बेडूकही मध्ये आला होता. जवळच असणाऱ्या एका कॅमेऱ्याने रॉकेटसोबतच या बेडकाचाही फोटो टिपला.

नासाने आपल्या एक्स (ट्विटर) हँडलवरून हा फोटो शेअर केला आहे. "कधी तुम्ही रॉकेट असता, आणि कधी तुम्ही बेडूक असता" असं कॅप्शन नासाने या फोटोला दिलं आहे. रॉकेट वरती जाताना तयार झालेल्या प्रेशरमुळे जवळ असणारा हा बेडूकही हवेत उंच उडाला, आणि हाच क्षण शेजारी असणाऱ्या रिमोट कॅमेऱ्यात कैद झाला.

नेटिझन्सनी वाहिली श्रद्धांजली

नासाने आपल्या वेबसाईटवर देखील याबाबत माहिती दिली आहे. या बेडकाचं पुढे काय झालं, हे मात्र आपल्याला माहिती नसल्याचं नासाने म्हटलं आहे. नासाची याबाबतची एक्स पोस्ट चांगलीच व्हायरल होते आहे. या बेडकाचे कित्येक फॅन्सही असून, 'सुपरक्लस्टर' नावाच्या वेबसाईटने या बेडकाला श्रद्धांजली देखील वाहिली आहे.

या वेबसाईटवर नासाच्या कित्येक अंतराळवीरांची माहिती देण्यात आली आहे. यावर या बेडकाचं नाव 'Minotaur V Frog' असं देण्यात आलं आहे. विशेष म्हणजे या बेडकाचा उल्लेखही एक अंतराळवीर म्हणून करण्यात आला आहे.