YouTube India Notice : व्हिडिओ ब्रॉडकास्टिंग प्लॅटफॉर्म यूट्यूबच्या भारतातील युनिटसमोर मोठ्या अडचणी आल्या आहेत. राष्ट्रीय बाल हक्क संरक्षण आयोगाने (NCPCR) चक्क पॉक्सो कायद्याचे उल्लंघन केल्याचा आरोप करत यूट्यूब इंडियाला नोटीस पाठवली आहे.

एनसीपीसीआरचे प्रमुख प्रियंक कानूनगो यांनी याबाबत माहिती दिली. ते म्हणाले, की यूट्यूबवर सध्या असे हजारो व्हिडिओ उपलब्ध आहेत, ज्यामध्ये आई आणि (अल्पवयीन) मुलगा एकमेकांना लिपलॉक किस करत आहेत. अशा प्रकारच्या व्हिडिओंचं व्यावसायीकरण करणे म्हणजे पॉर्नला चालना देणं आहे. त्यामुळेच यूट्यूबला नोटीस पाठवण्यात आली आहे.

"अशा प्रकारच्या व्हिडिओंच्या माध्यमातून लहान मुलांना अब्यूज केलं जातं. अशा प्रकारचे अश्लील व्हिडिओ हे किशोरवयीन मुलांमधील उत्तेजनांना चालना देत आहे. भारतात हे चालणार नाही. यूट्यूबला यावर कारवाई करावीच लागेल", असंही प्रियंक पुढे म्हणाले.

आई-मुलाचं नातं पवित्र

आई आणि मुलाचं नातं अगदी पवित्र आहे. मात्र, अशा प्रकारच्या व्हिडिओंमध्ये या नात्याला चुकीच्या पद्धतीने दाखवलं जातं. हे स्पष्टपणे या लहान मुलांचं लैंगिक शोषण आहे. जर हे प्रकार थांबले नाहीत, तर NCPCR याप्रकरणी FIR देखील दाखल करेल. पुढे मग यूट्यूब इंडियाच्या अधिकाऱ्यांना तुरुंगात पाठवलं जाईल याचीही खबरदारी आम्ही घेऊ; असंही प्रियंक यांनी खडसावून सांगितलं.