Paytm Auto Test : फिनटेक सेक्टरमधील अग्रगण्य कंपनी असणारी पेटीएम ही आता आणखी एका सेक्टरमध्ये उडी घेणार आहे. पेटीएम आता लवकरच राइड हेलिंग सर्व्हिसेस पुरवणाऱ्या कंपन्यांच्या पंक्तीत जाऊन बसेल. यासाठी ऑटोरिक्षाची चाचणी सुरू करण्यात आल्याची माहिती मनीकंट्रोलने दिली आहे.

रिपोर्टमध्ये दिलेल्या माहितीनुसार, येत्या काही दिवसांमध्ये पेटीएम दिल्ली, बंगळुरू, चेन्नई अशा महानगरांमध्ये ऑटोरिक्षा सर्व्हिस सुरू करणार आहे. यासाठी पेटीएम ओएनडीसी, म्हणजेच ओपन नेटवर्क फॉर डिजिटल कॉमर्सची मदत घेईल.

ओला-उबरचं टेन्शन वाढणार

देशात अ‍ॅप बेस्ड कॅब, टॅक्सी आणि रिक्षा सुविधा देणाऱ्या कंपन्यांमध्ये ओला आणि उबरचा दबदबा आहे. गेल्या काही काळात रॅपिडो आणि इतर काही स्थानिक अ‍ॅप्समुळे यात स्पर्धा वाढली आहे. यातच आता पेटीएम सारखा मोठा प्लेयर यात आल्यामुळे ओला-उबरचं टेन्शन नक्कीच वाढणार आहे.

ठराविक यूजर्ससाठी फीचर उपलब्ध

रिपोर्टमध्ये दिलेल्या माहितीनुसार, ठराविक पेटीएम अ‍ॅप्सवर राईड हेलिंग फीचर उपलब्ध झालं आहे. या फीचरची चाचणी पूर्ण झाल्यावर टप्प्या-टप्प्याने ते इतर यूजर्ससाठी उपलब्ध करुन देण्यात येईल. पेटीएमने याबाबत अधिकृत माहिती दिलेली नाही.