नवी दिल्ली : संपूर्णत: भारतात विकसित केलेल्या नॅनो क्रिस्टलाइन रिबन्स आणि ऍमॉर्फस रिबन्स या उत्पादनांच्या यशस्वी निर्मितीसाठी पुण्यातील विकर्ष नॅनो टेक्‍नॉलॉजी अँड ऍलॉइज या संस्थेला केंद्र सरकारच्या विज्ञान व तंत्रज्ञान विभागाच्या अधिपत्याखाली असलेल्या टेक्‍नॉलॉजी डेव्हलपमेंट बोर्ड या संस्थेतर्फे पुरस्कार देऊन गौरविण्यात आले आहे.

"टेक्‍नॉलॉजी डे'च्या निमित्ताने येथील विज्ञान भवन येथे आयोजित करण्यात आलेल्या एका विशेष सोहळ्यात राष्ट्रपती प्रणव मुखर्जी यांच्या हस्ते हा पुरस्कार प्रदान करण्यात आला.

विकर्ष नॅनो टेक्‍नॉलॉजीचे संचालक समीर शिंदे, मिलिंद वाणी यांनी पुरस्कार स्वीकारला. केंद्रीय विज्ञान व तंत्रज्ञानमंत्री डॉ. हर्ष वर्धन हेही या वेळी उपस्थित होते. मानचिन्ह आणि पंधरा लाख रुपये रोख असे या पुरस्काराचे स्वरूप आहे.