Rapido Data Breach : भारताच्या लोकप्रिय बाइक-टॅक्सी अ‍ॅप Rapido मध्ये आढळलेल्या एका मोठ्या बगमुळे हजारो वापरकर्ते आणि ड्रायव्हर्सचा वैयक्तिक डेटा लिक झाला होता. या डेटा लीकमध्ये संपूर्ण नावं, फोन नंबर आणि ईमेल आयडी समाविष्ट होते, ज्यामुळे गोपनीयता आणि सुरक्षेवर गंभीर प्रश्न निर्माण झाले आहेत.
भारतीय सुरक्षा संशोधक रेंगनाथन पी यांनी Rapido च्या फीडबॅक फॉर्ममध्ये हा बग शोधला. हा फॉर्म वापरकर्ते आणि ड्रायव्हर्सकडून अभिप्राय गोळा करण्यासाठी वापरला जात होता. फॉर्ममध्ये वापरलेल्या API मध्ये त्रुटी असल्यामुळे संवेदनशील माहिती एका थर्ड-पार्टीसोबत शेअर केली जात होती.
या बगमुळे 1,800 हून अधिक फीडबॅक फॉर्म प्रभावित झाले, ज्यामध्ये ड्रायव्हर्स आणि वापरकर्त्यांचे फोन नंबर आणि ईमेल आयडी उघड झाले होते. हा डेटा हॅकर्ससाठी मोठा धोका ठरला असता, कारण याचा वापर सोशल इंजिनीअरिंग हल्ले करण्यासाठी किंवा डार्क वेबवर माहिती विकण्यासाठी होऊ शकतो.
संशोधकांनी इशारा दिला की, उघड झालेल्या डेटाचा वापर फिशिंग घोटाळे किंवा अन्य अपायकारक कृतींसाठी केला जाऊ शकतो. अशा प्रकारच्या माहितीचा सायबर गुन्हेगारांकडून मोठ्या प्रमाणावर गैरवापर होण्याची शक्यता आहे.
रॅपिडोने हा प्रकार समजताच त्वरीत कारवाई करत उघडलेल्या पोर्टलला खासगी बनवले. रॅपिडोचे सीईओ अरविंद संका यांनी टेकक्रंचला दिलेल्या पत्रात सांगितले, "सर्वसाधारण कार्यपद्धतीनुसार, आम्ही आमच्या सेवेवरील मोलाच्या अभिप्रायासाठी आमच्या स्टेकहोल्डर वर्गाकडून फीडबॅक गोळा करत आहोत. हे सर्व बाहेरच्या संस्थांद्वारे व्यवस्थापित केले जात आहे, परंतु आम्हाला समजले आहे की काही चुकीच्या वापरकर्त्यांना सर्वेक्षण लिंक पोहोचली आहेत."
Rapido ची ही घटना भारताच्या झपाट्याने वाढणाऱ्या डिजिटल अर्थव्यवस्थेतील डेटा लीकच्या धोक्यांकडे लक्ष वेधते. याआधी McDonald’s India (West & South) मध्येही अशाच प्रकारचा डेटा लीक उघड झाला होता, जिथे डिलिव्हरी सिस्टमच्या बगमुळे ग्राहक आणि डिलिव्हरी पार्टनर्सचा डेटा उघड झाला होता.
या घटनेने कंपन्यांना वापरकर्त्यांच्या डेटाचे योग्यरित्या संरक्षण करण्यासाठी अधिक प्रभावी आणि मजबूत डेटा सुरक्षा उपाय लागू करण्याची गरज अधोरेखित केली आहे. Rapido आणि इतर कंपन्यांनी यापुढे अशा गोपनीयतेच्या चुकांपासून सावध राहण्याची गरज आहे, जेणेकरून वापरकर्त्यांचा विश्वास टिकवला जाईल आणि भविष्यात अशा घटनांना आळा बसेल.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.