Smart India Hackathon 2023 : मंगळवारी स्मार्ट इंडिया हॅकेथॉनचा अंतिम सोहळा पार पडला. या कार्यक्रमाला पंतप्रधान नरेंद्र मोदी देखील उपस्थित होते. यावेळी पंतप्रधानांनी 'एआय' म्हणजे आर्टिफिशिअल इंटेलिजन्सबाबत चर्चा केली. एआय हे वेगाने प्रगती करत असून, नागरिकांनी नवीन टेक्नॉलॉजीबाबत सतर्क रहायला हवं असं ते म्हणाले.

आत्मनिर्भर होण्याचं लक्ष्य

पंतप्रधान यावेळी बोलताना म्हणाले, की भारताकडे जगातील सर्वात मोठं प्रतिभेचं भांडार आहे. जगाचा भारतावर विश्वास आहे. जागतिक आव्हानांना तोंड देण्यासाठी भारत गुणवत्तापूर्ण, टिकाऊ आणि व्यापक उपाय देऊ शकतो. टेक्नॉलॉजी हा जीवनाचा अभूतपूर्व भाग झाली आहे. त्यामुळे तंत्रज्ञान आयात न करणे, किंवा त्यासाठी दुसऱ्यांवर अवलंबून न राहणे हे भारताचं लक्ष्य असायला हवं.

डीपफेक

आर्टिफिशिअल इंटेलिजन्स हे वेगाने बदलतंय. एका समस्येवर उपाय शोधला तर लोक दुसरी समस्या उभारू शकतात. कोणत्याही नवीन तंत्रज्ञानाबाबत आपल्याला सतर्क राहणं गरजेचं आहे. जर नियमांचे पालन करुन टेक्नॉलॉजी वापरली तर त्याचा भरपूर फायदा होऊ शकतो. मात्र जर चुकीच्या पद्धतीने याचा वापर केला तर कित्येक समस्या निर्माण होऊ शकतात.

डीपफेक व्हिडिओ हे अगदी खरे वाटतात, त्यामुळे कोणत्याही फोटो किंवा व्हिडिओवर विश्वास ठेवण्यापूर्वी आपल्याला विचार करण्याची गरज आहे. यासाठी भारत एक वैश्विक आराखडा तयार करत आहे; असं पंतप्रधान यावेळी म्हणाले.

स्टडी इन इंडिया

स्मार्ट इंडिया हॅकेथॉनचा अंतिम राउंड अहमदाबादमध्ये पार पडला. यावेळी पंतप्रधान मोदी व्हिडिओ कॉन्फरन्सिंगच्या माध्यमातून या कार्यक्रमाला उपस्थित होते. पंतप्रधानांनी यावेळी भारतीय रेल्वेबाबत देखील चर्चा केली. "भारतीय रेल्वे आता कात टाकत आहे. केंद्र सरकार यावर हजारो रुपये खर्च करत आहे. आमचा फोकस लॉजिस्टिक्सवर आहे. तुमच्या टीममध्ये बांगलादेशमधील विद्यार्थ्यांना पाहून मला आनंद झाला. उच्चशिक्षणासाठी भारतात येणाऱ्या विद्यार्थ्यांसाठी आम्ही 'स्टडी इन इंडिया' अभियान सुरू केलं आहे." असंही ते म्हणाले.