ऐंशी आणि नव्वदच्या दशकात सामान्यांची लाडकी दुचाकी 'लूना आता पुन्हा एकदा बाजारात येणार आहे. मात्र, यावेळी ही गाडी इलेक्ट्रिक स्वरुपात आपल्या भेटीला येणार आहे. कंपनीच्या सीईओ सुल्लजा फिरोदिया मोटवानी यांनी स्वतः याबाबत माहिती दिली आहे.

बाजारात सध्या ई-बाईक्सची चलती आहे. नवनवीन कंपन्या इलेक्ट्रिक दुचाकींच्या मार्केटमध्ये येत असताना, जुन्या मोठ्या कंपन्याही कमबॅक करण्याचा प्रयत्न करत आहेत. काही दिवसांपूर्वीच बजाजने आपल्या चेतक स्कूटरचे इलेक्ट्रिक व्हर्जन लाँच केले होते. यानंतर आता लूनानेही या स्पर्धेत उडी घेतली आहे.

कंपनीच्या सीईओ सुल्लजा यांनी एका ट्विटर पोस्टमध्ये आपल्या वडिलांचा जुना फोटो पोस्ट केला आहे. यामध्ये ते लुना गाडीवर बसलेले दिसत आहेत. "ब्लास्ट फ्रॉम दि पास्ट! 'चल मेरी लूना' आणि ती बनवणारे माझे वडील पद्मश्री अरुण फिरोदिया! कायनॅटिक ग्रीनच्या मदतीने काहीतरी क्रांतिकारी आणि रोमांचक गोष्ट समोर येत आहे. तुम्ही बरोबर ओळखलं.. ही ई-लूना आहे." अशा आशयाची पोस्ट सुल्लजा यांनी केली आहे.

ई-लूना हे कायनॅटिक ग्रीन एनर्जी अँड पॉवर सोल्यूशन्स ग्रुपतर्फे लाँच करण्यात येणारे पहिलेच मॉडेल असेल. मीडिया रिपोर्टनुसार कंपनीने चेसिस आणि इतर पार्ट्सची निर्मिती देखील सुरू केली आहे. कंपनी दर महिन्याला ५ हजार युनिट्सची निर्मिती करेल, असं सांगण्यात येत आहे. हे लक्ष्य वेळेनुसार आणि गरजेनुसार वाढत जाईल. महाराष्ट्रातील अहमदनगर येथे या मॉडेलची निर्मिती होईल.

१९७२ मध्ये झाली होती लाँच

भारतामध्ये १९७२ साली कायनॅटिक इंजिनिअरिंगने तयार केलेली लूना लाँच करण्यात आली होती. अवघ्या ५० सीसी क्षमतेचं इंजिन असणारी ही मोपेड होती. यावेळी याची किंमत केवळ दोन हजार रुपये होती. यानंतर लुनाचे टीएफआर, डबल प्लस, विंग्स, मॅग्नम आणि सुपर असे बरेच व्हेरियंट समोर आणण्यात आले होते.