Tata Motors Price Hike from February : भारतातील अग्रगण्य वाहन निर्माती कंपनी टाटाने एक मोठी घोषणा केली आहे. टाटाच्या सर्व गाड्यांच्या किंमती एक फेब्रुवारीपासून वाढणार आहेत. कच्च्या मालाच्या किंमती वाढल्यामुळे हा निर्णय घेण्यात आल्याचं कंपनीने स्पष्ट केलं आहे. यामुळे टाटाच्या प्रसिद्ध Nexon, Tiago, Punch आणि इतर सर्व गाड्यांच्या किंमती वाढणार आहेत.

किती वाढणार किंमती?

टाटाने दिलेल्या माहितीनुसार, 1 फेब्रुवारी 2024 पासून कंपनीच्या सर्व पॅसेंजर कार्सच्या किंमती 0.7 टक्क्यांनी वाढणार आहेत. टाटाच्या एकूण ग्लोबल सेलमध्ये गेल्या वर्षीच्या तुलनेत यावर्षी 9 टक्क्यांनी वाढ दिसून आली. कमर्शिअल व्हेईकल्सच्या विक्रीत एक टक्का वाढ होती, तर पॅसेंजर कार्स सेगमेंटमध्ये ही वाढ पाच टक्के एवढी होती. याच कालावधीमध्ये जॅग्वार लँड रोव्हरच्या विक्रीमध्ये तब्बल 27 टक्क्यांनी वाढ दिसून आली. न्यूज18 ने याबाबतचं वृत्त प्रसिद्ध केलं आहे.

टाटाने म्हटलं, की उत्पादन खर्च कमी करण्यासाठी कंपनी सातत्याने प्रयत्न करत आहे. मात्र, काही प्रमाणात दरवाढ करणं गरजेचं आहे. गाड्यांच्या मॉडेलनुसार दरवाढीचं प्रमाण हे वेगवेगळं असणार आहे, असंही कंपनीने स्पष्ट केलं आहे. यापूर्वी टाटाने गेल्या वर्षी एप्रिलमध्ये दरवाढीची घोषणा केली होती. ही दरवाढ 2023 च्या मे महिन्यापासून लागू केली होती.

मारूतीनेही वाढवल्या किंमती

टाटासोबतच इतर कार कंपन्यांनी देखील आपल्या किंमतीमध्ये वाढ केली आहे. मारुती सुझूकीने 16 जानेवारी रोजी आपल्या गाड्यांच्या किंमती वाढवण्याची घोषणा केली होती.