आर्टिफिशिअल इंटेलिजन्सचे गंभीर दुष्परिणाम भविष्यात उद्भवू शकतात हे आता जवळपास सर्वांनीच मान्य केलं आहे. त्यामुळेच, असे धोके कमी करण्यासाठी प्रमुख टेक कंपन्यांनी अमेरिकेचे राष्ट्राध्यक्ष जो बायडेन यांच्यासोबत एक करार केला आहे. यामध्ये गुगल, ओपन एआय, मेटा आणि अशाच मोठ्या कंपन्यांचा समावेश आहे.

यावेळी एआय संबंधित धोक्यांवर उपाययोजना करण्यासाठी नवीन गाईडलाईन्स तयार करण्यासंबंधी चर्चा झाली. यासाठी सर्व प्रमुख टेक कंपन्यांनी सहमती दर्शवली. यात खबरदारीचे उपाय म्हणून एआयच्या सुरक्षिततेची चाचणी करणे आणि त्यांचे निकाल सार्वजनिक करणे याचा समावेश आहे.

अमेझॉन, अँथ्रोपिक, मेटा, गुगल, इन्फ्लेक्शन, ओपन एआय या कंपन्यांनी व्हाईट हाऊससोबत हा करार केला आहे. ओपन एआय कंपनीने गेल्या वर्षी आपला चॅटजीपीटी हा चॅटबॉट लाँच केला होता. त्यानंतर गुगलनेही आपलं एआय समोर आणलं होतं.

काय आहे करार?

या कराराचा भाग म्हणून, कंपन्या आपलं कोणतंही नवीन एआय मॉडेल लाँच करण्यापूर्वी त्याची इंटर्नल आणि एक्स्टर्नल सिक्युरिटी टेस्ट करणार आहेत. यामुळे लोक वॉटरमार्क वापरून एआय शोधण्यात सक्षम आहेत, आणि एआयची क्षमता आणि मर्यादा सार्वजनिकपणे उपलब्ध आहेत हे सुनिश्चित होईल. तसेच पक्षपात, भेदभाव आणि गोपनीयतेवर हल्ला करणे अशा जोखमींबाबत देखील या कंपन्या संशोधन करतील. (AI Safeguards White House)

जबाबदारी गरजेची

"आज आम्ही दिलेलं वचन हे वास्तविक आणि ठोस आहे. एआय हे जगभरातील लोकांचं जीवन बदलणार आहे. यामुळेच एआयला योग्य जबाबदारीने आणि सुरक्षितपणे डिझाईन करणे गरजेचं आहे. इथं उपस्थित असलेले लोक यासाठी अत्यंत महत्त्वाचे आहेत." असं मत बायडेन यांनी व्यक्त केलं. ते व्हाईट हाऊसमधील बैठकीनंतर बोलत होते.

"एआय हे लोकांच्या फायद्यासाठी असायला हवं. यासाठीच सर्व प्रमुख कंपन्यांनी जबाबदारी वाटून घेणं गरजेचं आहे. नवनवीन एआय मॉडेल तयार करताना कंपन्यांनी पारदर्शक असायला हवं. तसंच, कंपन्यांनी सरकार, उद्योग, शैक्षणिक क्षेत्र आमि नागरी समाजासोबत मिळून काम करायला हवं", असं मत मेटाचे ग्लोबल अफेअर्स प्रेसिडेंट निक क्लेग यांनी व्यक्त केलं.