जगातील इलेक्ट्रिक कार्स बनवणारी सगळ्यात मोठी कंपनी टेस्ला बऱ्याच काळापासून भारतात एंट्री करण्याच्या विचारात आहे. काही कारणास्तव वारंवार याबाबतच्या चर्चा पुढे जात नव्हत्या. आता पुन्हा एकदा टेस्लाकडून याबाबत चर्चेचा प्रस्ताव पुढे करण्यात आला आहे

गेल्या महिन्यात पंतप्रधान नरेंद्र मोदी अमेरिका दौऱ्यावर गेले होते. यावेळी टेस्लाचे मालक आणि सीईओ इलॉन मस्क यांनी मोदींची भेट घेतली होती. यावेळी या दोघांमध्ये सकारात्मक चर्चा झाल्याचे स्पष्ट झाले होते. त्यामुळे सरकार आता टेस्लाच्या प्रस्तावावर विचार करण्याची शक्यता आहे.

भारतात उभारणार प्लांट

भारतात आपला प्रॉडक्शन प्लांट उभारून, देशातच टेस्ला कार्स तयार करण्याचा कंपनीचा मानस आहे. यापूर्वी टेस्लाने याबाबत तयारी दाखवली नव्हती. त्यामुळे टेस्लाचा भारतात येण्याचा प्रस्ताव सरकारने फेटाळला होता. मात्र, आता भारतात निर्मिती करण्यासाठी टेस्ला तयार असल्याची माहिती सूत्रांनी दिली आहे.

टाईम्स ऑफ इंडियाने दिलेल्या माहितीनुसार, भारतात एका वर्षाला ५ लाख इलेक्ट्रिक कार्स बनवता येतील एवढी मोठी फॅक्टरी उभारण्याचा टेल्साचा प्रस्ताव आहे. (Elon Musk Meets Modi)

किंमत असणार कमी

टेस्लाने आपल्या प्रस्तावात या इलेक्ट्रिक कार्सच्या किंमतीबाबत देखील माहिती दिली आहे. भारतासाठी ते परवडणाऱ्या दरामध्ये कारची निर्मिती करतील. अमेरिकेच्या तुलनेत तब्बल १५ लाख रुपये कमी किंमतीमध्ये भारतात या कार्स मिळू शकतील. त्यामुळे, भारतात टेस्लाच्या गाड्या २० लाख रुपयांपर्यंत मिळू शकतील असा अंदाज व्यक्त कऱण्यात येत आहे.

या चर्चांबाबत टेस्ला किंवा भारत सरकार या दोघांकडूनही अधिकृत माहिती मिळाली नाही. तरीही, टेस्लासोबत भारत सरकारचा करार यावेळी पूर्ण होऊ शकतो अशा चर्चा आहेत. यामुळे सध्या इलेक्ट्रिक मार्केटमध्ये येण्याच्या प्रयत्नात असणाऱ्या भारतीय कंपन्यांचं टेन्शन मात्र वाढणार आहे.