Anti-Mosquito Air Defense Machine : डास हा कीटक शक्यतो कुणालाच आवडत नाही. कधीही येऊन चावणारे, कानापाशी गुणगुण करून डोकं उठवणारे मच्छर मारण्यासाठी आपण कित्येक उपाय करून पाहतो. कॉईल लावणे, धूप लावणे किंवा मग केमिकल्स असलेले मशीन वापरणे असे कित्येक पर्याय आपण वापरतो. मात्र एका इंजिनियरने डासांच्या समस्येवर वेगळाच उपाय शोधला आहे.

चीनमधील एका इंजिनियरने चक्क मच्छर मारण्यासाठी एक छोटीशी एअर डिफेन्स सिस्टीम तयार केली आहे. इस्राइलची आयर्न डोम सिस्टीम ज्याप्रमाणे हवेतून येणाऱ्या मिसाईल आणि छोट्या विमानांना टार्गेट करते, त्याप्रमाणेच ही सिस्टीम आजूबाजूला उडणाऱ्या डासांना लक्ष्य करत असल्याचा दावा या इंजिनियरने केला आहे.

व्हिडिओ होतोय व्हायरल

या मशीनचा व्हिडिओ सध्या सोशल मीडियावर व्हायरल होतो आहे. वर्ल्ड ऑफ इंजिनिअरिंग नावाच्या एक्स हँडलवरुन हा व्हिडिओ पोस्ट करण्यात आला आहे. या व्हिडिओमध्ये दिसतंय, की ही मशीन कशा प्रकारे लेझरने डासांना मारत आहे. ज्याने हा व्हिडिओ बनवला आहे, त्याने चक्क मेलेल्या डासांना एका डायरीमध्ये चिटकवून त्यांचा रेकॉर्ड देखील ठेवला आहे.

सत्यतेवर प्रश्नचिन्ह

दरम्यान, कित्येक एक्स यूजर्स या व्हिडिओच्या सत्यतेवर प्रश्नचिन्ह उपस्थित करत आहेत. या मशीनमधील सेन्सरचे रिझॉल्यूशन हे डासांना डिटेक्ट करण्यासाठी पुरेसे नसल्याचं काही जणांनी म्हटलं आहे. तर, त्यातील लेझर देखील मच्छरांना मारण्याएवढी स्ट्राँग किंवा फास्ट नसल्याचंही यूजर्स म्हणत आहेत.

नेटकऱ्यांच्या भन्नाट प्रतिक्रिया

यासोबतच कित्येक नेटिझन्सनी या मशीनचं कौतुक केलं आहे. अशी मशीन खरोखरच असेल, तर ती चीनची असूनही मी खरेदी करेल; असं एका यूजरने म्हटलं आहे. तर या लेझरमुळे माणसांना तर काही धोका नाही ना? असे प्रश्नही उपस्थित करण्यात येत आहेत.