Zimbabwe Introduces Licensing Fee for WhatsApp Admins : व्हॉट्सॲप हे दैनंदिन जीवनाचा अविभाज्य भाग बनले आहे. संवाद साधण्याचे एक प्रभावी माध्यम म्हणून ते आज घराघरात वापरले जाते. मित्र, कुटुंबीय, सहकारी, व्यवसाय, शैक्षणिक गट, आणि समाजातील विविध घटक यांदरम्यान व्हॉट्सॲपमुळे संपर्क सुलभ झाला आहे.
झिम्बाब्वे सरकारने डिजिटल संप्रेषणावर नियंत्रण ठेवण्यासाठी एक महत्त्वपूर्ण पाऊल उचलले आहे, ज्यात व्हॉट्सॲप ग्रुप ॲडमिनिस्ट्रेटरना आता परवाना घेणे आवश्यक असेल.
नव्या कायद्यानुसार, झिम्बाब्वेतील प्रत्येक व्हॉट्सॲप ग्रुप प्रशासकाला त्यांच्या गटाच्या नोंदणीसाठी झिम्बाब्वेच्या पोस्ट आणि टेलिकम्युनिकेशन्स रेग्युलेटरी अथॉरिटी (POTRAZ) मध्ये अर्ज करावा लागेल, तसेच त्यासाठी 50 डॉलर (सुमारे 4200 रुपये) शुल्क भरावे लागेल.
माहिती, संप्रेषण तंत्रज्ञान, पोस्टल आणि कुरिअर सेवा मंत्री ततेंडा म्वेटेरा यांनी हा निर्णय जाहीर करताना सांगितले की, या नव्या नियमामुळे झिम्बाब्वेमध्ये चुकीची माहिती आणि अफवा पसरवण्यावर नियंत्रण ठेवले जाईल. सोशल मीडियावर अफवा आणि असत्य माहिती पसरल्यामुळे देशात निर्माण होणारी अस्थिरता आणि समाजातील शांतता बिघडू शकते. या कायद्यामुळे प्रशासनाला अफवांचे मूळ शोधणे सोपे होईल, असे मत मंत्री मोनिका मुत्सवांगवा यांनी व्यक्त केले.
झिम्बाब्वे सरकारचा हा कायदा देशाच्या डेटा संरक्षण कायद्याशी सुसंगत आहे. कायद्यानुसार, व्हॉट्सॲप ग्रुप ॲडमिन्सकडे त्यांच्या गटातील सदस्यांची वैयक्तिक माहिती असते. ॲडमिन्सना सदस्यांच्या फोन नंबरचा अ‍ॅक्सेस असल्याने, ही माहिती डेटा संरक्षण कायद्याच्या कक्षेत येते. ॲडमिन्सनी त्यांच्या नोंदणीकृत गटासाठी परवाना घेणे आणि वैयक्तिक माहिती सादर करणे गरजेचे आहे.
व्हॉट्सॲप ग्रुपमुळे समूह चर्चा सोपी झाली असून विविध माहिती, संदेशन, फोटो, आणि व्हिडिओ तत्काळ शेअर करता येतात. विशेषतः महामारीच्या काळात, ऑनलाइन वर्ग, वर्क फ्रॉम होम, आणि डिजिटल व्यवसायांसाठी व्हॉट्सॲप एक आवश्यक साधन ठरले आहे.
तथापि, सोशल मीडियावर अफवा आणि चुकीची माहिती पसरवण्याचे प्रमाण देखील वाढले आहे. अशा परिस्थितीत, झिम्बाब्वे सरकारने आणलेले हे नवे नियम देशात अस्थिरता टाळण्यासाठी आणि समाजात शांतता राखण्यासाठी महत्त्वाचे ठरतील. परंतु, अनेक समीक्षकांच्या मते, या नव्या नियमामुळे गोपनीयतेवर आघात होईल आणि लोकांच्या अभिव्यक्ती स्वातंत्र्यावर मर्यादा येतील.
संपूर्ण डिजिटल जगामध्ये, अशा प्रकारच्या परवान्यांमुळे व्यक्तीच्या डिजिटल अधिकारांवर प्रश्न उपस्थित होऊ शकतात. त्यामुळे या कायद्याचा प्रभाव आणि त्याचे सामाजिक परिणाम यांवर पुढील काळात लक्ष राहणार आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.