नवी दिल्लीः 'व्हॉट्सअ‍ॅप'ने एक नवीन फिचर सादर केलं आहे. कंपनीचा दावा आहे की, नवीन फिचरमुळे ग्रुप कॉलिंगचा अनुभव आणखी मजेदार होईल. एकाचवेळी तब्बल ३१ युजर्सचा ग्रुप कॉलिंगमध्ये समावेश होऊ शकतो.

WABteaINFO च्या रिपोर्टनुसार WhatsApp कॉल टॅबमध्ये काही बदल करण्यात आलेले आहेत. त्यातूनच ३१ युजर्सना एकाच वेळी कॉल करण्याची सुविधा मिळणार आहे. व्हॉट्सअ‍ॅपने याचे अँड्रॉईड बीटा अपडेट जारी केलेले आहे. ते २.२३.१९.१६ व्हर्जनमध्ये अॅक्सेस केले जावू शकते.

यापूर्वी व्हॉट्सअ‍ॅपवर जास्तीत जास्त १५ लोकांसोबत ग्रुप कॉल करता येऊ शकत होता. त्यापूर्वी केवळ सात लोकांना एकाचवेळी कॉलिंगची सुविधा होती. आता मात्र ३१ जण एकाचवेळी व्हॉट्सअ‍ॅप कॉल करु शकतात. मित्रांचा एक मोठा ग्रुप या फिचरमुळे ऑनलाईन व्हिडीओ कॉलद्वारे कनेक्ट होऊ शकतो.

व्हॉट्सअ‍ॅपचे चॅनेल

व्हॉट्सअ‍ॅपने अलिकडेच व्हॉट्सअ‍ॅप चॅनेल फिचर आणले आहे. कोणताही युजर याद्वारे स्वतःचे चॅनेल सुरु करु शकतो. हे एक ब्रॉडकास्टिंग चॅनेल असून याद्वारे मोठ्या संख्येच्या ग्रुपला अपडेट्स पुरवता येणार आहेत. १५० पेक्षा जास्त देशांमध्ये व्हॉट्सअ‍ॅपने चॅनेल फिचर लाईव्ह केले आहे.