Whatsapp Web Calling Feature : व्हॉट्सअ‍ॅप वापरणाऱ्यांसाठी एक दिलासादायक बातमी आहे. आता व्हॉट्सअ‍ॅप वेब वापरताना थेट ब्राऊझरवरून व्हॉईस आणि व्हिडिओ कॉल करता येणार असून यासाठी वेगळं डेस्कटॉप अ‍ॅप डाऊनलोड करण्याची गरज भासणार नाही. हे नवं अपडेट सध्या बीटा चाचणी टप्प्यात असून लवकरच सर्व वापरकर्त्यांसाठी उपलब्ध होणार आहे.

ब्राऊझरमध्ये दिसतील कॉलचे नवीन पर्याय

जगभरात ३.५ अब्जांहून अधिक वापरकर्ते असलेल्या व्हॉट्सअ‍ॅपने आपल्या डेस्कटॉप वापरकर्त्यांसाठी हे नवं वैशिष्ट्य उपलब्ध करून दिलं आहे. यापूर्वी, संगणकावरून व्हॉईस किंवा व्हिडिओ कॉल करायचा असेल तर विंडोज किंवा मॅकसाठी खास अ‍ॅप डाऊनलोड करणं आवश्यक होतं. मात्र आता फक्त ब्राऊझरमधूनच कॉल करता येणार आहे ज्यामुळे विशेषतः ऑफिसमध्ये वेब व्हर्जन वापरणाऱ्यांना मोठा फायदा होणार आहे.

या नव्या अपडेटनंतर व्हॉट्सअ‍ॅप वेबमध्ये चॅट बटणाशेजारीच फोन आणि कॅमेरा आयकॉन्स दिसणार आहेत, ज्यावर क्लिक करून थेट कॉल करता येईल. ही सुविधा वापरणं अतिशय सोपं असून यामुळे कॉलिंगची प्रक्रिया अधिक गतीशील आणि सुलभ होणार आहे. हे सर्व करताना सुरक्षेलाही तितकंच महत्त्व देण्यात आलं आहे.

WABetaInfo ने दिली माहिती

व्हॉट्सअ‍ॅपवरील अपडेट्ससाठी ओळखलं जाणारं WABetaInfo या वेबसाइटने या नव्या सुविधेबद्दल प्रथम माहिती दिली. त्यांच्या रिपोर्टनुसार, हे फीचर सध्या बीटा व्हर्जनमध्ये चाचणीसाठी उपलब्ध आहे आणि लवकरच सर्व वापरकर्त्यांपर्यंत पोहोचवण्याची तयारी सुरू आहे.

प्रायव्हसीसाठी ‘Advanced Chat Privacy’ अपडेट

व्हॉईस व व्हिडिओ कॉलिंगसह अजून एक महत्त्वपूर्ण अपडेट म्हणजे ‘Advanced Chat Privacy’. या नव्या सेटिंगमुळे वापरकर्ते त्यांचे चॅट्स एक्सपोर्ट होण्यापासून किंवा शेअर होण्यापासून वाचवू शकतात. संवेदनशील माहितीच्या सुरक्षिततेसाठी हे एक प्रभावी पाऊल मानलं जात आहे.

Meta कंपनीकडून व्हॉट्सअ‍ॅपमध्ये सतत नवे बदल करण्यात येत आहेत. अलीकडेच वापरकर्त्यांना HD प्रतिमांमध्ये फोटो व व्हिडिओ शेअर करण्याची सुविधा, स्टेटसवर गाणी शेअर करण्याचा पर्याय आणि अनेक इतर नव्या फिचर्स देखील देण्यात आले आहेत.

ही सर्व नवकल्पना एकत्र येऊन वापरकर्त्यांना अधिक सुरक्षित, सुलभ आणि आधुनिक डिजिटल संवादाचा अनुभव देतात.