गुगलचं व्हिडिओ स्ट्रीमिंग प्लॅटफॉर्म असणारं यूट्यूब हे जगप्रसिद्ध आहे. स्मार्टफोन वापरणारी जवळपास प्रत्येक व्यक्ती यूट्यूब वापरतेच. युट्यूबवर इन्फर्मेटिव्ह व्हिडिओ पाहून अभ्यास करणाऱ्या लोकांची संख्याही कमी नाही. त्यामुळेच, यूट्यूब आता अशा यूजर्ससाठी नवीन फीचर्स लाँच करत आहे.

एज्युकेशनल व्हिडिओ

यूट्यूबवर एज्युकेशनल किंवा अकॅडमिक कंटेंटसााठी एक ऑटोमॅटिक फीचर देण्यात येणार आहे. यामुळे व्हिडिओमध्ये दिलेल्या माहितीमधील ठळक मुद्दे हे फोटो आणि टेक्स्ट स्निपेटच्या माध्यमातून यूजरला मिळेल. म्हणजेच, तुम्ही ज्या विषयाचा व्हिडिओ पाहत आहात, त्यातील प्रमुख मुद्दे तुम्हाला वेगळे दिसतील.

सध्या यूट्यूबचं हे फीचर बायोलॉजी, फिजिक्स आणि केमिस्ट्रीसारख्या विषयांमध्ये उपयोगी ठरणार आहे. येत्या काळात इतर विषयांबाबत देखील असं फीचर लागू केलं जाऊ शकतं.

यूट्यूब शॉर्ट्स

शॉर्ट्स हा प्रकार यूट्यूबवर भरपूर प्रसिद्ध होतो आहे. यूजर्स कित्येक तास स्क्रोल करत हे व्हिडिओ पाहत राहतात. त्यामुळे, शॉर्ट्स व्हिडिओ बनवणाऱ्यांसाठी देखील कंपनी नवीन फीचर्स आणत आहे. सध्या यूट्यूबच्या शॉर्ट व्हिडिओंमध्ये Q&A स्टिकर हे फीचर देण्यात येणार आहे.

क्वेश्चन अँड आन्सर या स्टिकरच्या माध्यमातून क्रिएटर्स आपल्या यूजर्सना एखादा प्रश्न विचारू शकतील. यूजर्स कमेंट सेक्शनमध्ये या प्रश्नाचं उत्तर देऊ शकतात. कंपनीच्या वेबसाईटवर असणाऱ्या यूट्यूब टेस्ट फीचर्स अँड एक्सपेरिमेंट्स या पेजवर याबाबत माहिती देण्यात आली आहे.