इचलकरंजी: जांभळी (ता.शिरोळ,जि.कोल्हापूर ) येथे सप्टेंबर बिग बटरफ्लाय मंथ निमित्त ऑक्सिजन पार्कवर 'बटरफ्लाय वॉक' चे आयोजन करण्यात आले. तीन तास झालेल्या वॉक मध्ये तब्बल 28 प्रकारच्या फुलपाखरांची ओळख झाली. फुलपाखरांच्या जीवनाची जवळून ओळख फुलपाखरू अभ्यासक डॉ.संतोष उमराणे व सर्वदमन कुलकर्णी यांनी करून दिली.जिल्ह्यात यंदा पहिल्यांदाच असा उपक्रम घेण्यात आला.भिरभिरणाऱ्या फुलपाखरांची ओळख करून घेताना सर्वजण भारावून गेले. पर्यावरण लेखिका व अभ्यासक चित्कला कुलकर्णी, डॉ.बडे कुटुंबिय यांच्या मार्गदर्शनाने बटरफ्लाय वॉक अधिक भारी ठरला.

जांभळीतील ऑक्सिजन पार्क जैवविविधतेची गोडी उत्तमपणे जोपासत आहे.आता 28 प्रकारच्या फुलपाखरांची झालेली नोंद ही जैवविविधतेला अधिक बळ देणारी ठरली आहे.पुढील काळात फुलपाखरांच्या संवर्धनासाठी गावात बटरफ्लाय गार्डनची उभारणी केली जाणार आहे. यावेळी जितेंद्र शिंदे, सलमान कुडचे, आकाश यादव, बाळकृष्ण शिंदे, विनायक भुयेकर, यासीन दानवाडे, संदीप पाटील, संदीप बिरंजे,अर्जुन मोरे,विनायक कोळी,भगतसिंग गायकवाड,स्वाती ऐनापुरे आदी उपस्थित होते.