Jungle Safari : भारतात अनेक मोठी घनदाट आणि उंच जंगले आहेत. या हिरव्यागार आणि घनदाट जंगलांमध्ये विविध प्रकारचे वन्यजीव वास्तव्यास आहेत. भारतातील मिझोरम या राज्यात देशातील सर्वाधिक वनक्षेत्र आहे. यासोबतच मध्य प्रदेशात सर्वाधिक वन जमिन आहे. आपल्या देशातील विविध राज्यांमध्ये अनेक अभयारण्ये, जंगले आहेत. ही अभयारण्ये पर्यटकांसाठी खुली करण्यात आली आहेत.

जर तुम्हाला जंगलात फिरायची आवड असेल, तर तुम्ही उन्हाळ्याच्या सुट्टीत जंगल सफारीचा आनंद घेऊ शकता. भारतात अशी अनेक ठिकाणे आहेत. जिथे तुम्ही जंगल सफारीला जाऊ शकता. अभयारण्यांमध्ये तुम्हाला विविध प्रकारचे वन्यजीव पहायला मिळतील आणि निसर्गाच्या सानिध्यात ही वेळ घालवता येईल. चला तर मग जाणून घेऊयात या ठिकाणांबद्दल.

जिम कॉर्बेट राष्ट्रीय उद्यान

जिम कॉर्बेट राष्ट्रीय उद्यान हे भारतातील सर्वात लोकप्रिय आणि जुने राष्ट्रीय उद्यान आहे. विशेष म्हणजे वाघांच्या विविध प्रकारच्या जाती या उद्यानात पहायला मिळतात. त्यामुळे, देश-विदेशातील पर्यटक या उद्यानाला भेट देताना दिसतात. उन्हाळ्याच्या सुट्टीत तुम्ही कुटुंबासोबत या ठिकाणी फिरायला नक्की जाऊ शकता. या उद्यानात तुम्ही जीप सफारीतून वन्यप्राण्यांना पाहू शकता. मार्च ते मे या दरम्यान तुम्ही या उद्यानाला भेट देऊ शकता. (Jim Corbett National Park)

कान्हा राष्ट्रीय उद्यान

मध्यप्रदेश या राज्यात हे कान्हा राष्ट्रीय उद्यान स्थित आहे. हे राष्ट्रीय उद्यान घनदाट जंगलासाठी प्रसिद्ध आहे. १९५५ मध्ये या उद्यानाला राष्ट्रीय उद्यानाचा दर्जा मिळाला.

रेनडिअर या प्राण्याच्या नामशेष झालेल्या प्रजाती या उद्यानामध्ये पहायला मिळतात. या कान्हा राष्ट्रीय उद्यानात तुम्ही जंगल सफारीचा आनंद घेऊ शकता. भारतातील हे सर्वात लहान राष्ट्रीय उद्यान आहे. शिवाय, ट्रेकिंगसाठी देखील हे उद्यान सुप्रसिद्ध आहे. (Kanha National Park)

पश्चिम बंगालचे सुंदरबन जंगल

सुंदरबन हे रॉयल बंगाल टायगर(वाघ) साठी जगभरात प्रसिद्ध आहे. सुंदरबन हे जंगल भारतातील सर्वात मोठे आणि धोकादायक जंगल म्हणून ओळखले जाते. हे घनदाट जंगल भारत आणि बांग्लादेशच्यामध्ये स्थित आहे. हे जंगल गंगा नदीच्या काठावर वसले असून, या जंगलात वाघासोबतच, हत्ती, बिबट्या, मगरी, वनगाय इत्यादी अनेक प्रकारचे प्राणी पहायला मिळतात. येथे खाऱ्या पाण्यातील मगरींचे देखील वास्तव्य आहे. (Sundarbans National Park)