कास : हिरवे हिरवे गार गालिचे, हरित तृणांच्या मखमालीचे, या सुंदर मखमालीवरती, फुलराणी ती खेळत होती.. या बालकवींच्या उक्तीप्रमाणे फुलांची पंढरी असलेल्या कास पठारावर (Kaas Pathar) जिकडे तिकडे रंगीबेरंगी फुलांचे गालिचेच पाहावयास मिळत आहेत.

कास हंगाम (Kaas Plateau Flowering Season) सुरू होऊन पंधरा दिवस झाले आहेत. गेल्या काही दिवसांपासून पावसाने उघडीप देऊन उन्हाची चांगलीच तिरीप पठाराला लागत आहे. त्यामुळे कास पठारावर रंगीबेरंगी फुलांचा सोहळा ऐन बहरात आला आहे. विशेषतः कुमुदिनी तलावाच्या (Kumudini Lake) परिसरात असलेल्या भागात लाल गुलाबी तेरडा, पांढरा गेंद यांचे मोठ्या प्रमाणात गालिचे पाहावयास मिळत आहेत. हे गालिचे पाहून पूर्वीच्या कास पठाराची आठवण आवर्जून येत आहे.

त्याबरोबर निळी सीतेची आसवे, सोनकी, अबोलीमा, अभाळी, नभाळी, मंजिरी, चवर, टूथब्रश, कापरू, पंद, भुईचक्र यासारखी अनेक फुले बहरली आहेत. बहुतांश ठिकाणी लाल, निळ्या, पांढऱ्या रंगाचे छोटेमोठे गालिचे तयार झाले आहेत. पठारावरील नयनरम्य सुंदर फुलांना पाहण्यासाठी पर्यटक कासला गर्दी करत आहेत. चोहोबाजूला हिरवागार निसर्ग, गुलाबी थंडी, अधूनमधून येणारे धुके यामुळे पर्यटक कुटुंबासमवेत पर्यटनाचा आनंद लुटत आहेत.

अनुकूल नैसर्गिक परिस्थितीमुळे यावर्षी कासवर फुलांचा चांगला बहर आहे. या फुलांचे जीवनमान फार कमी काळ टिकते. त्यामुळे पर्यटकांनी या महिनाअखेरपर्यंत कासवर आल्यास मोठ्या प्रमाणात फुले पाहता येतील. पर्यटकांनी गैरसोय टाळण्यासाठी व चांगल्या प्रकारे निसर्गाचा आनंद घेण्यासाठी शनिवार, रविवार सोडून यावे.

-दत्ता किर्दत, अध्यक्ष, कास समिती

कुमुदिनी तलावात उमलले कमळ

कास पठारावरील महाबळेश्वरकडे जाणाऱ्या राजमार्गावरील तीन किलोमीटर अंतरावर असणाऱ्या कुमुदिनी तलावात नायफांडिस इंडिका (कुमुदिनी) नावाची कमळे बहरण्यास सुरुवात झाली आहे. तलाव असंख्य फुलांनी बहरलेले पाहावयास मिळत आहे. तलावात मोजता येणार नाही, एवढी पांढरी शुभ्र कमळे फुललेली आहेत. कासचा फुलोत्सव ऐन बहरात आला आहे.