नागपूर : टाळेबंदीच्या काळात सर्वाधिक फटका बसलेला पर्यटन व्यवसायास सुगीचे दिवस येण्याची शक्यता आहे. कारण, पर्यटनाला जाण्यासाठी लोक आतापासूनच नियोजन करू लागलेले आहेत. हिवाळी पर्यटनाबद्दल काश्मीरसह इतरही महत्त्वाच्या स्थळांबद्दल सतत विचारणा होऊ लागली आहे. गोवा, कोकण, थंड हवेची ठिकाणे आणि जंगल भ्रमंतीकडे कल वाढू लागला असून, हे पर्यटन स्थळेही सज्ज होत आहे. यामुळेच सहल आयोजकांच्या चेहऱ्यांवर हास्य फुलले आहे. सहलींची तयारी प्राथमिक सुरू झालेली आहे, असे आयोजकांचे म्हणणे आहे.

कोरोना आणि लॉकडाउनमुळे त्रस्त झालेल्या लोकांना आणि पर्यटकांना शासनाने काहीसा दिलासा दिला आहे. कोरोनाचा प्रभाव कमी होत असल्यामुळे शासनाने टप्प्याटप्याने अनलॉक ची प्रक्रिया सुरू आहे. त्यामुळेच हळूहळू पर्यटन स्थळे अनलॉक होत आहेत. आगामी काळात आता पर्यटनास बहर येणार आहे.

मागील वर्षी आणि यावर्षीही कोरोना महामारीमुळे घरी राहून त्रस्त झालेल्या पर्यटकांना आणि लहानथोरांना आता मनमोकळा पर्यटन करता येणार आहे. मागील काही कालावधीपासून कोरोनाचा प्रकोप वाढल्याने आधी संचारबंदी आणि मग लॉकडाउन सुरू झाल्याने पर्यटन बंद होते. पर्यटनस्थळे पर्यटकांविना सुनी पडली होती.

सध्या राज्यात मॉन्सून अंतिम टप्प्यात आला असून, सर्वत्र निसर्गाने हिरवी शाल पांघरली आहे. त्यामुळे हिरव्यागार डोंगररांगा आणि निसर्गरम्य समुद्रकिनारे पर्यटकांना खुणावत आहेत. निसर्गाचे मनमोहक रूप मनात साठविण्यासाठी पर्यटक निसर्ग रम्य, दऱ्या डोंगरावर भटकंती करण्यासाठी बाहेर पडू लागलेले आहेत.

हिवाळी पर्यटनालाही पर्यटक पसंती देत असल्याचे दिसून आले आहे. टाळेबंदीमुळे सक्तीने घरातच बसावे लागलेला वर्ग खुपच कंटाळला होता. हा सर्व वर्ग आता वर्षा पर्यटनाचा तसेच हिवाळी पर्यटनाचा बेत आखत आहे. दमदार पावसामुळे निसर्गाने मनमोहक अशी हिरवाई वाढली आहे. त्यातच आगामी हिवाळी हंगाम येणार असल्याने त्यासाठी आतापासूनच नियोजन पर्यटकांनी सुरू केल्याचे दिसून येत आहे.