पोलिसांकडून नागरिकांना वाईट वागणूक दिल्याच्या अनेक घटना आपल्याला माहिती असतात. दिल्लीत रस्त्यावर गिटार वाजवत गाणे गात असलेल्या एका कलाकाराला पोलिस हकलवून देत असतानाचा व्हिडीओ सोशल मीडियावर व्हायरल होत आहे. यानंतर लोक पोलिसांवर झोडून टीका करत आहेत. यादरम्यान मुंबई पोलिसांचा एक सुखावणारा व्हिडीओ देखील शेअर केला जात आहे.

दिल्लीतील कॅनॉट प्लेस या ठिकाणचा हा व्हिडिओ असून या व्हायरल क्लिपमध्ये एक पोलीस कर्मचारी गर्दीने वेढलेल्या गिटार वादकाला हात धरून उचलत असल्याचं दिसतं आहे. वेब सीरिज 'मिर्झापूर' फेम राजेश तैलंगने ट्विटरवर दिल्ली पोलिसांचा हा अमानवी चेहरा उघड करणारा व्हिडीओ पोस्ट केला आहे.

व्हिडिओ शेअर करताना अभिनेत्याने लिहिले की, 'ही क्लिप इंस्टाग्रामवर पाहिली. दिल्ली पोलिसांची ही कृती योग्य नाही. हे कलाकार आपली दिल्ली आणखी सुंदर आणि संगीतमय बनवतात. यासोबतच त्यांनी शेम असंही लिहीलंय.

व्हिडिओमध्ये तुम्ही पाहू शकता की कलाकार गिटार वाजवत आहे. आजूबाजूला त्याचे गाणे ऐकणाऱ्यांची गर्दी दिसत आहे. तेवढ्यात एक पोलीस येतो आणि गिटारवादकाला जबरदस्तीने उचलू लागतो.

राजेश तैलंग यांच्या ट्विटला रिप्लाय देत बॉलिवुड दिग्दर्शक सुधीर मिश्रा यांनी देखील यावर प्रतिक्रिया दिली आहे. हे योग्य नसून जग आता राजवाड्यात राहणाऱ्यांचे उरलंय. जे लोक रस्त्यावर चालताना आणि त्यांचा प्रवास सुसह्य आणि आनंददायक बनवणाऱ्या गायकांना ऐकतात त्यांचं नाही, असं ट्विट केलं आहे. त्यांच्या या ट्विटला रिप्लाय देत अभिनेते अनूप सोनी यांनी मुंबई पोलिसांचा हा सुखावणार व्हिडीओ शेअर केला आहे.

या व्हिडीओमध्ये मुंबई पोलिस एका गायकाचं गाणं मन लावून ऐकताना दिसत आहेत. तसेच मुंबई पोलासांनी हा व्हिडीओ सोशल मीडिया स्टोरीमध्ये शेअर केल्याचे देखील दिसून येत आहे. या व्हिडीओतून मुंबई पोलिसांचा मानवी चेहरा दिसून येतोय. या व्हिडीओवर देखील लोक प्रतिक्रिया देत आहेत.