Frog Viral Video : आजवर जंगलातले, जंगली प्राण्यांचे, पाळीव प्राण्यांचे अनेक व्हिडीओ आपण पाहतो. काही व्हिडीओ बघून अंगावर काटा येतो तर काही बघून हसू आवरत नाही. पण बऱ्याचदा अशा काही आश्चर्यकारक गोष्टी समोर येतात की, आपल्याच डोळ्यांवर विश्वास बसत नाही.

असाच एक व्हिडीओ समोर आला आहे. हा व्हिडीओ बघून तुम्हालाही आश्चर्य वाटेल आणि ११ सेकंदाचा हा व्हिडीओ तुम्हीही पुन्हा पुन्हा बघाल. जंगलातला हा व्हिडीओ म्हणजे एका पतंग आणि बेडकाच्या संघर्षाचा आहे. व्हिडीओत बघायला मिळतंय की, एक पतंग उडत उडत येतो. जमीनीवर दबा धरून बसलेल्या बेडकाने पतंग जवळ येताच जीभ लांब करून त्याला पकडलं. पण गोष्ट इथेच संपत नाही.

त्या पतंगाला पकडताच त्याचा सुटण्यासाठी संघर्ष सुरू होतो. पूर्ण शक्ती लावून तो उडायचा प्रयत्न करत होता. पण फायदा होत नाही. मग तो अजून जोर लावून उडू लागतो तर बेडकाला च्युइंगमसारखा तो खेचू लागतो. पतंग वर उडायचा प्रयत्न करतो तर बेडूक त्याला खाली खेचायचा प्रयत्न करतो. पण यात पुढच्या काही क्षणात जे घडतं ते बघून तुमचा विश्वास बसणार नाही.

साधारण एखाद्या बेडकाचं वजन १००-२०० ग्रॅमपासून ते ३ किलोपर्यंत असतं. यात दिसणारा बेडूक वजनी दिसत आहे. पण पतंगाच्या इच्छाशक्तीपुढे त्यानेही गुडघे टेकवले. प्रयत्न करणारा कधी हारत नाही हेच खरं. आणि चक्क त्या पतंगाने बेडकाला उडवत हवाई सफर घडवली.