झारखंडच्या धनबाद जिल्ह्यात उड्डाण घेतल्यानंतर जॉयराइड ग्लायडरचा मोठा अपघात झाल्याची घटना घडली आहे. उड्डाण केल्यानंतर हा ग्लायडर एका निवासी इमारतीवर आदळला, त्यामध्ये पायलट आणि १४ वर्षीय प्रवासी जखमी झाले असून दोघांनाही गंभीर अवस्थेत रुग्णालयात दाखल करण्यात आल्याचे अधिकाऱ्यांनी सांगितले आहे. या घटनेचा व्हिडिओ सोशल मीडियावर व्हायरल झाला आहे.

अधिक माहितीनुसार, धनबाद जिल्ह्यातील बारवाडा एअरस्ट्रिप येथून या ग्लायडरने उड्डाण केलं होतं. त्यानंतर फक्त ५०० मीटर अंतर पुढे गेल्यानंतर ते एका रहिवाशी इमारतीवर कोसळले. तांत्रिक बिघाडामुळे हा अपघात झाल्याचं सांगण्यात येत असून पुढील तपास पोलीस करत असल्याची माहिती आहे. तपासानंतर अपघाताचे नेमके कारण कळू शकेल अशी माहिती आहे.

दरम्यान, ग्लायडरमध्ये बसलेल्या १४ वर्षाच्या मुलाने हा व्हिडिओ शूट केला असल्याचं सांगण्यात येत आहे. या अपघातामध्ये घराच्या खांबामुळे ग्लायडर तुटलेलं दिसत असून या भीषण अपघाताचा व्हिडिओ सध्या सोशल मीडियावर चांगलाच शेअर केला जात आहे.