पैठण (छत्रपती संभाजीनगर) : इन्स्टाग्राममधील चूक (Bug) शोधून काढल्याने छत्रपती संभाजीनगर येथील एका विद्यार्थ्याला मेटा कंपनीने ३० लाखांचे बक्षीस जाहीर केले आहे. इंस्टाग्रामच्या अॅपमधील बग्स शोधून काढल्याबद्दल पैठण येथील विद्यार्थ्याला ही रक्कम जाहीर झाली आहे.

इन्स्टाग्राम युजर्सच्या खात्यात काही त्रुटी आल्यामुळे त्याने इन्स्टाग्राम आणि फेसबुकवर बग असल्याचा शोध लावला. त्यानंतर त्याने मेटा कंपनीला या बाबतची तक्रार केली होती.

दरम्यान, सदर विद्यार्थ्याने त्रुटीसंदर्भात दावा केल्यानंतर मेटा कंपनीने विद्यार्थ्याला डेमो शेअर करण्यास सांगितलं. त्यानंतर त्याने १० मिनीटांचा डेमो व्हिडिओ शेअर केला. या डेमो व्हिडिओमध्ये दिसून आलं की, कोणत्याही परवानगीशिवाय इंस्टाग्रामच्या खात्यावरील माहिती बदलत आहे.

या प्रकरणाचा तपास केल्यानंतर फेसबुकने १६ मार्च रोजी या विद्यार्थ्याला ३७ हजार डॉलर्स म्हणजे ३० लाख रूपयांचे बक्षीस जाहीर केले आहे. यासंबंधात फेसबुकने त्याला माहिती दिली आहे.

काय होती इंस्टाग्रामची चूक

विद्यार्थ्याने याने शोधलेल्या बगमध्ये, युजर्सच्या परवानगी शिवाय युजर्सच्या खाजगी/संग्रहित पोस्ट, कथा, रील, IGTV चे तपशील अनेकजण पाहू शकत होते व खात्यातील माहिती आपोआप बदलली जात होती. सोशल मीडियावरील आयडीच्या पुराव्याच्या आधारे ही माहिती बदलली असती तर यामध्ये युजर्सद्वारे हे बदलले असं समजू शकलो असतो. असा प्रकार कोणत्याही युजर्सबाबत घडू शकतो.