आपल्या घरात एखादा नवा पाहुणा येणारे असं कळालं की सर्वांनाच मुलखाचा आनंद होत असतो. तर अनेकदा आपल्याला लहान भाऊ किंवा बहिण होणार असल्याचं कळाल्यावरचा आनंद गगनात मावत नसतो. असाच एक व्हिडिओ सोशल मीडियावर व्हायरल झाला आहे.

व्हायरल होत असलेल्या व्हिडिओमध्ये एक आई आपल्या मुलाला घरात बोलावते आणि त्याला एक नवीन शर्ट घालते. त्यानंतर तो शर्टवरील अक्षरे वाचू लागतो. "मी आता मोठा भाऊ होणार आहे" असं त्यावर लिहिलेलं असतं. त्यानंतर या चिमुकल्या मुलाला मोठा आनंद होतो आणि त्यानंतर तो आपल्या आईला कडकडून मिठी मारतो.

हा मुलगा मागच्या दोन वर्षापासून आपल्या आईवडिलांना लहान भावंडाविषयी विचारत होता असं या व्हिडिओच्या कॅप्शनमध्ये लिहिलं आहे. तर या मुलाने आनंदित होऊन आईला मिठी मारल्यानंतर त्याच्या डोळ्यात आनंदाश्रू येत असल्याचं या व्हिडिओत दिसत आहे.

दरम्यान, सोशल मीडियावर व्हायरल झालेल्या या व्हिडिओला नेटकऱ्यांकडून चांगलीच पसंती मिळत असून अनेकांनी हा व्हिडिओ शेअर केलाय. या व्हिडिओवर अनेक नेटकऱ्यांनी आपल्या प्रतिक्रिया व्यक्त केल्या असून लाईक केलं आहे. सोशल मीडियावर व्हायरल होणारे व्हिडिओ आपल्याला खूप काही शिकवून जात असतात.