प्रवास करत असताना अनेकदा वस्तू चोरीला जात असतात. सहसा करून ट्रेनमध्ये किंवा बसमध्ये चोरी होते. तर बसस्थानक आणि रेल्वेस्थानकावरही मोठ्या प्रमाणात चोरट्यांचा सुळसुळाट असतो. रेल्वे प्लॅटफॉर्मवर गर्दीचा फायदा घेत चोरटे प्रवाशांच्या वस्तूंवर डल्ला मारतात. म्हणूनच प्रवास करताना अनेकजण मोबाईल किंवा इतर वस्तू चोरीला जाणार नाही, याची काळजी घेत असतात.

दरम्यान, आता मोकळ्या, विनागर्दी असलेल्या मेट्रो स्टेशनवरही चोरीच्या घटना वाढल्या आहेत. असाच एका मेट्रो स्टेशनवरील चोरीचा व्हिडिओ सध्या व्हायरल होतोय. त्यामध्ये मेट्रोचं दार बंद होत असल्याच्या शेवटच्या क्षणी व्यक्तीचा मोबाईल हिसकावून घेतला जातो. हा व्हिडिओ सोशल मीडियावर व्हायरल झाला आहे.

व्हायरल होत असलेला व्हिडिओ एका मेट्रो स्थानकावरील असून त्यामध्ये एक तरूण व्यक्तीच्या जवळ जाऊन बोलण्याचा प्रयत्न करतो. त्यानंतर मेट्रो आल्यानंतर हा व्यक्ती आत जातो आणि तरूण बाहेर थांबतो. तर दरवाजे बंद होण्याच्या क्षणी हा तरूण सदर व्यक्तीच्या हातातून मोबाईल हिसकावून घेतो आणि दरवाजा बंद होतो. त्यामुळे व्यक्ती आतच अडकून पडतो.

ही चोरीची घटना कॅमेऱ्यात कैद झाली आहे. सोशल मीडियावर व्हिडिओ चांगलाच व्हायरल झाला असून नेटकऱ्यांनी त्यावर आपल्या प्रतिक्रिया व्यक्त केल्या आहेत. यावरील विनोदी कमेंट वाचून आपल्याला हसू आवरणार नाही.