मुंबई : मुंबईसह राज्यात पावसाने थैमान घातलं आहे. मुंबईत अनेक ठिकाणी रस्त्यावर आणि वस्त्यामध्ये पाणी घुसलं आहे. तर नागरिकांचे नुकसान झाले असून पुराच्या पाण्यामध्ये अनेक वाहने वाहून गेल्याच्या धक्कादायक घटना समोर आल्या आहेत. पुराच्या पाण्याचे अनेक व्हिडिओ सोशल मीडियावर व्हायरल होत असतात.

मुंबई, ठाणे, कल्याण, डोंबीवली, नवी मुंबई या भागामध्ये मुसळधार पाऊस झाला आहे. पावसाचे पाणी रस्त्यावर आल्यामुळे मोठ्या प्रमाणात वाहतूक कोंडी झाली असून नागरिकांना याचा मोठ्या प्रमाणावर त्रास सहन करावा लागत आहे.

सध्या मीरा भाईंदर येथील एक व्हिडिओ व्हायरल होत असून कारला बाहेर काढण्यासाठी पाच ते सहाजण प्रयत्न करत असल्याचं दिसून येत आहे. तर दुसरी कार पाण्यामध्ये अर्धी बुडाल्याचं चित्र आहे. ठाण्यातील घोडबंदर रस्त्यावरील एका लेनवर पूर्णपणे पुराचे पाणी आल्याचा व्हिडिओ सुद्धा समोर आला होता.

मुसळधार पावसामुळे नागरिकांचे हाल

मुंबई आणि उपनगरामध्ये मुसळधार पावसाने हजेरी लावली आहे. यामुळे अनेक इमारतींच्या पार्किंकमध्ये पाणी घुसलं असून वस्त्यामध्ये पाणी घुसल्यामुळे अनेकांचे जनजीवन विस्कळीत झाले आहेत. पार्किंगमध्ये लावलेल्या गाड्यासुद्धा पुराच्या पाण्यात वाहून गेल्याच्या अनेक घटना घडल्या आहेत.

राज्यातील अनेक भागांत दमदार पाऊस

विदर्भातील नागपूर, वर्धा, बुलढाणा, अकोला, पश्चिम महाराष्ट्रातील कोल्हापूर आणि कोकणातील रत्नागिरी, सिंधुदुर्ग, रायगड जिल्ह्यात जोरदार पावसाने हजेरी लावली आहे. तर अनेक नद्यांना पूर आल्यामुळे नागरिकांचे नुकसान झाले आहे. वर्धा, यवतमाळ, अकोला बुलढाण्यामधील शेतकऱ्यांचे पिके पाण्याखाली गेले आहेत तर मराठवाड्यातील अनेक भागांत पाऊस नसल्यामुळे पेरण्याही न झाल्याची स्थिती आहे.