Friendship Day Viral Video : 'एखाद्याला हरभऱ्याच्या झाडावर चढवणे' ही म्हण चांगलीच प्रचलीत आहे. काहीही नसताना एखाद्याची खूप स्तुती करणे किंवा एखाद्याबद्दल अनेक गोष्टी चांगल्या बोलणे असा या म्हणीचा अर्थ काढला जातो. आपल्या आयुष्यातही असे अनेक प्रसंग घडले असतील. शाळेत असताना किंवा कॉलेजला असताना अनेक मुले मुलीला काही ना काही बहाण्याने बोलण्याचा प्रयत्न करत असतात.

सध्या असाच एक प्रकार समोर आला असून एक मुलगा मित्राच्या नादी लागला आणि मुलीला प्रपोज करायला गेला खरा पण घडलं भलतंच. प्रपोज करून प्रेम मिळवण्याच्या नादात या मुलाने मुलीचा मार खाल्ला आहे. सदर व्हिडिओ एका शाळेतील असून दोघेही शाळेतील विद्यार्थी असल्याचं त्यांच्या गणवेशावरून दिसून येत आहे. तर मुलगी या मुलाच्या कानाखाली मारत असून त्याला जाब विचारताना दिसत आहे.

दरम्यान, हा मुलगा मुलीची माफी मागत आहे, हात जोडून मला जाऊदे, सोड असं म्हणत आहे. तरीही मुलगी या मुलाच्या हाताला धरून त्याला प्रपोज का केलं? असं म्हणत जाब विचारत असल्याचं त्यांच्या हालचालीवरून दिसत आहे. मित्राच्या नादाला लागून या मुलाने चांगलाच मार खाल्ला आहे. तर यावर अनेकांनी आपल्या प्रतिक्रिया व्यक्त केल्या आहेत.

"ऐकावे मित्राचे करावे मनाचे, मित्र असाच सल्ला देत असतात, मित्राच्या सांगण्यावरून हा मुलगा हरभऱ्याच्या झाडावर चढला" अशा भन्नाट कमेंट या व्हिडिओवर नेटकऱ्यांनी केल्या आहेत.