प्रत्येक आईचं आणि लेकराचं नात अतूट असतं. आई हे प्रत्येक मुलासाठी वेगळं विश्व असतं. आईसाठी आपलं लेकरू प्रिय असतं, तसंच या नात्यातील बंधनसुद्धा अतूट असतं. मायलेकराच्या नात्यातील अतूट बंधनाचं दर्शन घडवणारी एक हृदयद्रावक घटना समोर आली आहे. आपल्या आईचा मृत्यू सहन न झाल्यामुळे लेकरानेही आपला जीव सोडल्याची घटना घडली आहे.

अधिक माहितीनुसार, ही घटना उत्तरप्रदेशातील ओब्रा येथे घडली असून हिरामणी गुप्ता या महिलेचे बुधवारी दुपारी निधन झाले होते. त्यांचा मोठा मुलगा राजेश गुप्ता मुंबईत कामाला होता. आईच्या निधनाची बातमी ऐकून मोठा मुलगा राजेश आणि छोटा मुलगा सुरेश हे दोघेही ओब्रा येथे आले.

अंत्यसंस्कारासाठी हिरामणी यांना नदीकाठी नेण्यात आले. त्यावेळी मोठा मुलगा राजेश गुप्ता याने आईला मुखाग्नी दिला. पण अंत्यसंस्कारानंतर थोड्याच वेळात राजेश याचाही धक्क्याने मृत्यू झाला. अंत्यसंस्कारासाठी उपस्थित असलेल्या लोकांनी त्याला हॉस्पिटलमध्ये दाखल केले पण डॉक्टरांनी त्याला मृत घोषित केले.

जन्मदात्या आईच्या जळत्या चितेसमोरच लेकाने प्राण सोडल्याची धक्कादायक घटना पाहून परिसरात हळहळ व्यक्त केली जात आहे. तर हा मृतदेह ताब्यात घेऊन पोलिसांनी तपास सुरू केला आहे.