तेलंगणा : लग्नासाठी मुलगी शोधली नाही म्हणून एका तरूणाने आपल्या जन्मदात्या आईचीच हत्या केल्याची धक्कादायक माहिती समोर आली आहे. तेलंगणा राज्यातील सिद्दीपेट जिल्ह्यातील बांदा मेलाराम येथे ही घटना घडली आहे. घटनेनंतर सदर आरोपीला पोलिसांनी अटक केली असून पुढील तपास सुरू असल्याचं सांगितलं.

अधिक माहितीनुसार, बांदा मेलाराम येथे व्यंकटम्मा नावाची ४५ वर्षीय महिला आणि तिचा अवघा २१ वर्षाचा मुलगा ईश्वर राहत होते. मागच्या काही दिवसांपासून ईश्वरसाठी त्याची आई लग्नासाठी मुलगी शोधत होती. पण लग्नासाठी मुलगी न मिळाल्याने ईश्वरने आधी विटांनी मारून आईची हत्या केली आणि त्यानंतर पोलिसांच्या कारवाईपासून वाचण्यासाठी त्याने आईचा गळा आणि पाय कापले.

पोलिसांनी सांगितले की, दिव्यांग असलेला ईश्वर आपल्याला लग्नासाठी मुलगी शोधावी यासाठी आईवर दबाव टाकत होता. तो दिव्यांग आणि बेरोजगार असल्यामुळे त्याला मुली मिळण्यासाठी अडचणी येत होत्या त्यामुळे त्याने आपल्या एका मित्राला हाताशी धरून जन्मदात्या आईची हत्या केली.

यानंतर महिलेच्या मुलीने याप्रकरणी पोलिसांत तक्रार दिली आणि मुलासह त्याच्या एका मित्राला अटक करण्यात आली आहे. याप्रकरणी पोलिसांनी आरोपीकडून गुन्ह्याची कबूली करून घेतली आहे.