Ashadhi Wari Viral Video : वारकरी संप्रदायाचा अत्यंत पवित्र आणि श्रद्धेचा असा आषाढी वारी सोहळा सध्या पुण्यात मोठ्या उत्साहात सुरू आहे. संत तुकाराम महाराज (देहू) आणि संत ज्ञानेश्वर महाराज (आळंदी) यांच्या पालख्या पुणे मुक्कामानंतर पंढरपूरच्या दिशेने रवाना होण्यासाठी सज्ज झाल्या आहेत. लाखो भाविक आणि वारकरींच्या जयघोषाने आणि टाळ-मृदुंगाच्या गजरात सारा पुणे शहर भक्तिमय झाले असतानाच काही समाजकंटकांनी याला गालबोट लावायचा प्रयत्न केला

वारीमध्ये सहभागी झालेल्या गर्दीचा फायदा घेत चोरट्यांनी दागिने, पाकिटं आणि पिशव्या चोरण्याचा सपाटा लावला आहे. विशेषतः महिला भाविकांचा या टोळक्यांनी जास्त फटका बसवला आहे. यामध्ये महिलांच्या गळ्यातील मंगळसूत्रे, कानातले, हातातील बांगड्या हिसकावण्याचे प्रकार समोर आले आहेत. दरवर्षी अशा घटना घडत असतानाही यंदा चक्क एका चोरट्या महिलेला मंगळसूत्र चोरताना रंगेहाथ पकडण्यात आलं आहे.

घटनास्थळावर उपस्थित असलेल्या परिवर्तन अॅकेडमीच्या काही तरुण-तरुणींनी ही महिला चोरट्याला वेळेवर पकडलं आणि तिचा प्रयत्न हाणून पाडत पोलिसांच्या ताब्यात दिलं. या घटनेचा व्हिडिओ सध्या सोशल मीडियावर व्हायरल होत आहे. गर्दीच्या गडबडीत, सर्वजण पालखीचं दर्शन घेत असताना ही महिला अत्यंत चपळाईने एका वारकरी महिलेच्या गळ्यातील मंगळसूत्र हिसकावण्याचा प्रयत्न करत होती. मात्र, जागरूक तरुणांच्या सतर्कतेमुळे हा कट उधळून लावण्यात यश आलं.

वारीसाठी पुणे शहर व ग्रामीण पोलीस प्रशासनाकडून कडेकोट बंदोबस्त ठेवण्यात आला आहे. पालखी मार्गांवर ड्रोनद्वारे देखरेख, वाहतूक नियंत्रण, आरोग्य आणि आपत्कालीन सुविधा यासाठी स्वतंत्र नियोजन करण्यात आले आहे.

पालखीतील महिलांचा वाढता सहभाग आणि त्यासोबत धोका

वारीमध्ये हजारो दिंड्या सहभागी होतात आणि त्यात महिलांची संख्याही मोठ्या प्रमाणावर असते. भक्तीभावाने सहभागी झालेल्या माय माऊली, भगिनींच्या गर्दीचा फायदा घेत हे टोळके आपली कुरापत साधत आहेत. त्यामुळे भाविकांनी वारीत सहभागी होताना आपले मौल्यवान दागिने न घालणे, महत्त्वाच्या वस्तू सुरक्षित ठेवणे आणि अनोळखी व्यक्तींपासून सावध राहणे आवश्यक आहे.

भाविकांसाठी पोलिसांचे आवाहन

पोलिसांनी नागरिकांना सतर्क राहण्याचे आणि कोणतीही संशयास्पद हालचाल दिसल्यास तात्काळ पोलिसांशी संपर्क साधण्याचे आवाहन केले आहे. वारी ही केवळ श्रद्धेची गोष्ट नसून, समाजाच्या सुरक्षा आणि शिस्तीचीदेखील परीक्षा असते. त्यामुळे प्रत्येक भाविकाने जबाबदारीने वागून वारीचा खरा आनंद लुटावा, असा सल्ला देखील देण्यात आला आहे.