प्रजासत्ता दिनाच्या दिवशी शाळेतील एका लहान मुलाचा व्हिडिओ सोशल मीडियावर व्हायरल झाला होता. शाळेतील ध्वजारोहणाच्या कार्यक्रमात विनोदी भाषण करत त्याने प्रेक्षकांची मने जिंकली होती. "आजपासून भारतात लोकशाही लागू झाली, लोकशाहीमध्ये काहीही करू शकतो. लोकशाही असल्यामुळे मी खेळतो, मोक्कार धिंगाणा करतो" अशा भाषणामुळे त्याने अनेकांची मने जिंकली होती. पण या मुलाला भाषण नेमकं कुणी लिहून दिलं?

हेही वाचा - ....इथं तयार होतो आपला लाडका तिरंगा

सोशल मीडियावर व्हायरल झालेल्या चिमुकल्याचं नाव कार्तिक वजीर असं असून तो जालना जिल्ह्यातील अंबड तालुक्यातील रेवलगाव येथील जिल्हा परिषदेच्या शाळेत शिकत असल्याची माहिती आहे. या शाळेतील तो पहिलीचा विद्यार्थी असून त्याचे वडील शेतकरी आहेत. त्याच्या घरची परिस्थितीही बिकट असून तो लहानपणापासून खोडकर असल्याची माहिती आहे.

दरम्यान, कार्तिक या विद्यार्थ्याला रातांधळेपणा हा आजार असल्याची माहिती त्याच्या कुटुंबियांनी दिली आहे. तर त्यामुळे त्याला कमी दिसते असं सांगण्यात येत आहे. तर त्याला त्यावरून शाळेतील मुलं चिडवतातही अशी माहिती आहे.

कार्तिकने भाषणात नेमकं काय म्हटलं होतं?

"लोकशाही असल्यामुळे मी खेळतो, मोक्कार धिंगाणा करतो, माकडासारखा झाडावर चढतो तर लोकशाही असल्यामुळे मला माझे वडील काहीच बोलत नाहीत. पण काही मुलं माझं नाव शाळेतील सरांना सांगतात आणि काही जण जसं लोकशाहीला पायदळी तुडवतात तसंच सर देखील मला पायदळी तुडवतात. पण मी खूप गरिब आहे, माझ्याएवढा गरिब अख्ख्या तालुक्यात कुणीच नसेल" अशा शब्दांत भाषण करत त्याने अक्षरश: प्रेक्षकांची मने जिंकली.

शिक्षकाने लिहून दिलं होतं भाषण

त्याच्या शिक्षकानेच त्याला भाषण लिहून दिल्याची माहिती कार्तिक याने दिली. भारत मस्के असं त्याच्या शिक्षकाचं नाव असून त्यांनी कार्तिकच्या बहिणीकडून त्याच्या भाषणाची तयारी करून घेतल्याची माहिती आहे.