चालत्या ट्रेनमधून पडून अनेकांचे जीव गेल्याचे प्रकार आपण अनेकदा पाहिले असतील किंवा धावत्या ट्रेनमध्ये स्टंट करणारे तरूणसुद्धा आपल्या निदर्शनास आले असतील. सध्या असाच एक व्हिडिओ सोशल मीडियावर व्हायरल झाला आहे. त्यामध्ये एक तरूण धावत्या लोकलमध्ये जीवघेणा स्टंट करताना दिसत आहे.

व्हायरल होत असलेला व्हिडिओ मुंबई लोकलमधील असल्याचं बोललं जात आहे. ट्रेनच्या दारात असलेल्या लोखंडी रॉडला धरून हा तरूण एक हात खाली सोडून खाली लटकताना दिसत आहे. रात्रीच्या वेळेसचा हा प्रकार दुसऱ्या एका प्रवाशाने कॅमेऱ्यात कैद केला आहे. तर काळजाचा ठोका चुकवणारा हा व्हिडिओ पाहून आपल्यालाही धक्का बसल्या शिवाय राहणार नाही.

दरम्यान, या तरूणाचा हात सुटला असता तर या तरूणाला जीव गमवावा लागला असता. धावत्या ट्रेनमधून पडल्यानंतर जिवंत राहण्याची शक्यता खूप कमी असते म्हणून असे स्टंट करणे चुकीचे आहे. हा व्हिडिओ सोशल मीडियावर चांगलाच व्हायरल झाला असून असे जीवावर बेतणारे स्टंट तरूण का करत असतील असा प्रश्न नेटकऱ्यांनी केला आहे.