मुंबई : यंदाच्या केंद्रीय अर्थसंकल्पात युवकांसाठी विशेष घोषणा करण्यात आल्या आहेत. तरुणांना अधिकाधिक रोजगाराभिमुख बनवण्यासाठी इंडस्ट्रीत आवश्यक असलेल्या कौशल्यांच्या प्रशिक्षणावर भर दिला जाणार आहे.

युवकांमध्ये आवश्यक कौशल्ये विकसित व्हावीत यासाठी देशभर ३० स्कील इंडिया सेंटर्स उभारली जाणार आहेत. इंडस्ट्रीत प्रत्यक्ष काम करण्यासाठी आवश्यक असणाऱ्या कौशल्यांचे प्रशिक्षण विद्यार्थ्यांना या सेंटर्समध्ये दिले जाणार आहे. (union budget 2023)

रोजगार देणारे आणि रोजगार घेणारे यांना एकाच व्यासपीठावर आणण्यासाठी सरकारतर्फे विशेष प्रयत्न केले जाणार आहेत. त्यासाठी एक डिजिटल प्लॅटफॉर्म विकसित केला जाणार आहे.

या डिजिटल प्लॅटफॉर्मवर सूक्ष्म, लघु, मध्यम असे सर्व प्रकारचे उद्योग असणारे व्यावसायिक एकत्र येऊ शकतील. या माध्यमातून रोजगाराच्या शोधात असणाऱ्या तरुणांना मोठा दिलासा मिळणार आहे. त्यांना रोजगारासाठीचा संघर्ष कमी होईल.

स्टार्टअपला पूर्वी ७ वर्षे करसवलत दिली जात होती. आता ही सवलत १० वर्षे दिली जाणार आहे. औद्योगिक तंटे सोडवण्यासाठी साहाय्यक आयुक्तांची नेमणूक केली जाणार आहे.