सोनगीर : नरडाणा एमआयडीसी झोन दोनमध्ये बाभळे हद्दीत गोदामातील हजारो क्विंटल गव्हाचा साठा केलेला आढळून आला. पुरवठा विभागाने शुक्रवारी (ता.१७) सायंकाळी प्रत्यक्ष पाहणी व कागदपत्रांची तपासणी केली. शनिवारी (ता. १८) दोन्ही गोदाम सील करण्यात आले.

बाभळे एमआयडीसीतील झोनमधील नॅशनल बल्क हॅंडलिंग कॉर्पोरेशनच्या दोन गोदामात महाराष्ट्र शासन खरीप हंगाम २०३-२२ लेबल असलेले गहूचे पोते मोठ्या प्रमाणात आढळून आले. जिल्हाधिकाऱ्यांच्या आदेशानुसार पुरवठा विभागाने पाहणी करून कागदपत्रांची तपासणी केली असता एका गोदामात सुमारे एक हजार ६०० मॅट्रिक टन व दुसऱ्या गोदामात एक हजार ५०० मॅट्रिक टन गव्हाचा साठा आढळून आला. शिंदखेडा पुरवठा निरीक्षक हर्षा दुधे, मंडलाधिकारी एन. एस.माळी, रोहिदास कोळी, सुभाष बाविस्कर यांनी ही कारवाई केली.