कुसुंबा (जि. धुळे) : येथील वीज वितरण कंपनीकडून वीज चोरी करणाऱ्यावर दंडात्मक कारवाई करण्यात आली. त्यात चार लाख ४४ हजार रुपयांची वसुली करण्यात आली. ही कारवाई सहाय्यक अभियंता शशिकांत गांगुर्डे यांच्या मार्गदर्शनाखाली करण्यात आली.

कुसुंबा परिसरात अचानक पथकांसह तपासणी केली असता, मोठ्या प्रमाणात वीज चोरी होत असल्याचे दिसून आले. यात वीजतारांवर आकडे टाकणे, मीटरमध्ये फेरफार करणे, अतिरीक्त लोड वापर आदी प्रकारची वीज चोरी करणारे व्यावसायिक व इतर ग्राहक आढळून आले. त्यात कुसुंबा येथे १२,

गोताणेत ९, कावठीत १२, चौगावला ४, अशा चारही गावांमध्ये धाडी टाकून ३७ जणांवर कारवाई करण्यात आली. त्यात चार लाख ४४ हजार रुपये वसूल करण्यात आले. वीज कंपनीचे सहाय्यक अभियंता शशिकांत गांगुर्डे, रवींद्र नेरपगारे, संदीप देशमुख, भारत कुवर, गणेश पगारे, भरत गोसावी आदींनी ही कारवाई केली.

दरम्यान, वीज वितरण कंपनीकडून मान्सूनपूर्व दुरुस्तीची कामे सुरू आहेत. त्यासाठी तारांना स्पर्श करणाऱ्या झाडांच्या फांद्या, लोंबकळणाऱ्या तारा आदी दुरुस्तीची कामे जोरात सुरू आहेत.

"ग्राहकांनी कुठल्याही प्रकारची वीज चोरी करू नये. तसे आढळून आल्यास दंडात्मक कार्यवाहीस सामोरे जावे लागेल. सध्या मान्सूनपूर्व कामे सुरू आहेत. त्यामुळे थोड्याफार प्रमाणात वीजपुरवठा वेळोवेळी खंडित होऊ शकतो, त्यासाठी वीज कंपनीला सहकार्य करावे. वीजपुरवठा खंडित करण्याची वेळ टाळण्यासाठी ग्राहकांनी वीजबिल त्या-त्या महिन्यांत भरावीत."

-शशिकांत गांगुर्डे, सहाय्यक अभियंता, कुसुंबा