भडगाव - राज्यात वाळू लिलावाच्या अभावी शासकीय अनुदानातून मंजूर असलेल्या घरकुल बांधण्याची कामे बंद पडली आहेत. त्यावर सरकारने तोडगा काढत एका घरकुलासाठी मोफत पाच ब्रास वाळू देण्याचा निर्णय घेतला आहे. या निर्णयाच्या अंमलबजावणीबाबत सरकारने मंगळवारी परिपत्रक काढले.

सप्टेंबर 2018 पासून राज्यात वाळू उचलण्यास बंदी आहे. त्यामुळे विकासकामांसह घरकुलांची कामे रखडली आहेत. बांधकाम व्यवसायही मंदावला आहे. वाळू लिलावाच्या संदर्भात अजूनपर्यंत निर्णय झालेला नाही. त्यामुळे आर्थिकदृष्ट्या दुर्बल घटकांकरिता मंजूर घरकुलांना "ब्रेक' लागला आहे. या पार्श्वभूमीवर सरकारने शासकीय अनुदान मंजूर घरकुलांना पाच ब्रासपर्यंत वाळू मोफत देण्याचा महत्त्वाकांक्षी निर्णय नोव्हेंबरमध्ये घेतला होता.