शिरपूर (जि. धुळे) : उच्चशिक्षित विवाहित युवतीने (newlywed women) शेतात काम करावे यासाठी तिचा शारीरिक व मानसिक छळ (Physical & mental harassment) करुन आत्महत्येस प्रवृत्त केल्याच्या संशयावरुन पाच जणांविरोधात सांगवी पोलिस ठाण्यात गुन्हा दाखल करण्यात आला. (5 charged with newlywed suicide dhule crime News)

लग्न होऊन महिनाही झाला नसताना नवविवाहितेने गळफास लावून आत्महत्या केल्याची घटना १६ जूनला जोयदा (ता.शिरपूर) येथील दोंदवाडेपाडा येथे घडली होती. मनीषा तोताराम पावरा (वय २६) असे मृत युवतीचे नाव असून २२ मेस तिचा विवाह तोताराम पावरा याच्याशी झाला होता. नर्सिंगचे प्रशिक्षण घेतलेल्या मनीषाच्या आत्महत्येमागील कारणांबाबत चर्चा सुरु होती. मनीषाचे माहेर न्यू बोराडी (ता.शिरपूर) येथील आहे. तिच्यावर अंत्यसंस्कार व त्यानंतरचे विधी आटोपल्यानंतर वडील सुदाम काना पावरा यांनी २० जूनला सांगवी पोलिस ठाण्यात फिर्याद दिली. विवाहानंतर २७ मे ते १६ जूनदरम्यान सुरु असलेल्या शारीरिक व मानसिक छळाला कंटाळून तिने १६ जूनला सायंकाळी घरात गळफास लावून आत्महत्या केली असे फिर्यादीत म्हटले आहे. संशयित पती तोताराम पावरा, सासरा मोतीराम पावरा, सासू शियानीबाई, दीर शांतिलाल, दिराणी आशाबाई (सर्व रा.दोंदवाडेपाडा) यांच्याविरोधात आत्महत्येस प्रवृत्त केल्याच्या संशयावरुन गुन्हा दाखल करण्यात आला.